Átta greindust innan­lands og allir í sótt­kví

Þetta kemur fram í uppfærðum tölum á Covid.is. 89 eru nú í einangrun, samanborið við 75 í gær. 695 eru nú í sóttkví, en voru 454 í gær. 1.134 eru nú í skimunarsóttkví. Þá er einn á sjúkrahúsi vegna Covid-19.

Alls hefur því 31 greinst með veiruna innanlands síðan á sunnudag og þar af sex utan sóttkvíar.

Fimm greindust á landamærum, þar sem allir greindust með virkt smit í fyrri landamæraskimun.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 9,3, en var 7,6 í gær. Nýgengi landamærasmita er nú 13,9, en var 12,5 í gær.

20.325 eru nú fullbólusettir hér á landi og er bólusetning hafin hjá 19.153 til viðbótar.

6.144 manns hafa nú greinst með kórónuveiruna hér á landi frá því faraldurinn hófst í lok febrúar. Þá hafa 29 dauðsföll verið rakin til Covid-19 á Íslandi frá upphafi faraldursins.

Alls voru tekin 1.558 einkennasýni hjá sýkla- og veirufræðideild Landspítalans og Íslenskri erfðagreiningu í gær. Þá voru 113 sýni tekin á landamærunum eða í seinni landamæraskimun og 449 í svokallaðri sóttkvíar- og handahófsskimun.

Fréttin hefur verið uppfærð.