Innlent

Einn greindist með kórónuveiruna innanlands

Sunna Kristín Hilmarsdóttir skrifar
Frá bólusetningu framlínustarfsfólks í síðasta mánuði.
Frá bólusetningu framlínustarfsfólks í síðasta mánuði. Vísir/Vilhelm

Einn greindist með kórónuveiruna innanlands í gær. Viðkomandi var ekki í sóttkví við greiningu. Þetta kemur fram í uppfærðum tölum á covid.is.

Um er að ræða Íslending sem kom til landsins á dögunum, fór í tvöfalda skimun á landamærunum með fimm daga sóttkví á milli líkt og reglur gera ráð fyrir og greindist neikvæður í báðum sýnatökum.

Þegar hann ætlaði síðan að fara úr landi og fór í skimun til að fá PCR-vottorð greindist hann með veiruna. Nú er beðið niðurstöðu mótefnamælingar varðandi það hvort um er að ræða nýja eða gamla sýkingu.

Þórólfur Guðnason, sóttvarnalæknir, segir í samtali við fréttastofu að það verði fróðlegt að sjá hvort að viðkomandi sé með mótefni og hafi þá sloppið í gegnum landamærin með neikvætt sýni.

Ef hann er hins vegar ekki með mótefni þá sé um að ræða nýtt innanlandssmit. Ef svo sé þurfi að fara vel ofan í það hvar viðkomandi hefur verið undanfarnar tvær vikur og hvar hann hafi þá mögulega smitast.

Einn greindist með virkt smit á landamærunum við fyrri sýnatöku í gær og einn greindist með mótefni. 244 einkennasýni voru tekin innanlands í gær og 600 sýni á landamærunum.

Nýgengi innanlandssmita er nú 0,8 og nýgengi landamærasmita 2,7. Fjórir eru í sóttkví og þrettán manns í einangrun. 894 eru í skimunarsóttkví, sjö eru á sjúkrahúsi og 12.600 manns eru fullbólusettir.

Fréttin hefur verið uppfærð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.