Segja að ekkert bendi til að eld­gos sé í vændum

„Hún er kannski álíka og sú sem kom árið 1933 og svo ekki ósvipuð þeirri sem kom um 1970,“ sagði Magnús Tumi Guðmundsson, prófessor í jarðeðlisfræði við Háskóla Íslands, í kvöldfréttum Stöðvar 2 í kvöld.

Jarðskjálftavirknin í dag hefur að mestu verið bundin við svæðið í kring um Fagradalsfjalla á Reykjanesskaga samkvæmt tilkynningu frá Vísindaráði almannavarna sem fundaði síðdegis í dag. Fram kemur í tilkynningunni að miðað við þær mælingar og gögn sem liggja fyrir bendi ekkert til þess að kvika sé að brjóta sér leið upp á yfirborðið. Þetta tekur Magnús Tumi undir.

„Það er ekkert sem bendir til þess að þetta sé að fara að gerast,“ segir Magnús. Hann segir þó að ef gjósi á næstu vikum eða mánuðum sé það varla áhyggjuefni. Eldgos á Reykjanesskaga séu frekar lítil en þau geti hins vegar verið nálægt byggð.

„Þetta eru flest hraungos en eru ekki stór. Þannig að lífshætta er varla fyrir hendi, ekki nema fólk fari of nálægt hrauninu. Við getum alveg ráðið við þetta og það byggir á því að við séum viðbúin og að kerfin séu í lagi. Þá getum við haldið áfram að gera það sem við þurfum að gera dags daglega,“ segir Magnús Tumi.

Skjálfti að stærð 6,5 yrðu engar hamfarir

Samkvæmt tilkynningu vísindaráðs er nú verið að horfa á tvær sviðsmyndir hvað framhaldið varðar. Annars vegar muni draga úr jarðskjálftavirkni næstu daga eða vikur eða hins vegar muni hrinan færast í aukana með stærri skjálftum sem geti orðið allt að 5,5-6,5 að stærð.

„Sá möguleiki er fyrir hendi að það verði skjálftar á þessu svæði sem engir skjálftar hafa verið á í töluvert langan tíma og er kennt við Brennisteinsfjöll. Ef það gerðist gæti það verið skjálfti sem næði stærðinni 6 til 6,5 og fólk þarf að vera undir það búið,“ segir Magnús Tumi.

Hann segir þó að skjálfti af slíkri stærð yrðu engar hamfarir.

„Þó að sá skjálfti kæmi væru það engar hamfarar. Hann yrði sterkari en sá sem við fengum í morgun og á miðvikudaginn en við erum ekki að horfa á nein stórslys. Húsin okkar þola þetta en við þurfum bara að vera búin undir þetta sjálf.“

Hann segir mikilvægast að fólk tryggi að innanstokksmunir séu öruggir og stórir og þungir skápar festir við vegg. Þá eigi fólk að passa að hafa ekki þunga hluti uppi á hillum, sérstaklega fyrir ofan rúm.

„Langflest hús á Íslandi eru byggð þannig að þau eigi að standast þá hrinu sem nú gengur yfir. Lausir munir, hillur, skápar o.s.frv. geta farið af stað og valdið hættu ef ekki er rétt frá þeim gengið. Því er mikilvægt að huga að innanstokksmunum á heimilum og á vinnustöðum svo þeir valdi ekki slysum,“ segir í tilkynningu vísindaráðs.

Þar kemur fram að áfram verði fylgst með framvindu mála og vísindaráð muni funda aftur í næstu viku.