Erlent

Sex gráðu hiti í húsinu í viku en fékk samt 900 þúsund króna rafmagnsreikning

Samúel Karl Ólason skrifar
Rafmagnsverð hækkaði gífurlega í Texas síðustu vikuna og sitja margir eftir með sárt ennið.
Rafmagnsverð hækkaði gífurlega í Texas síðustu vikuna og sitja margir eftir með sárt ennið. AP/David J. Phillip

Eftir gífurlega erfiða viku, nístingskulda og rafmagns- og vatnsleysi standa margir íbúar Texas í Bandaríkjunum nú frammi fyrir því að þurfa að greiða himinháa rafmagnsreikninga. Einhverjir íbúar hafa fengið reikninga fyrir allt að fimm þúsund dali, sem samsvarar tæpum 650 þúsund krónum, og er það fyrir eina viku.

Minnst einn íbúi fékk 900 þúsund króna reikning.

Lítið um er um lög og reglur þegar kemur að orkumarkaði Texas og bjóða orkusölur neytendum upp á að borga markaðsverð fyrir rafmagn, sem getur reynst fólki ódýrara þegar lítið álag er á kerfi ríkisins. Flestir viðskiptavinir kjósa þó að greiða fast verð.

Fyrirtækin sem um ræðir vöruðu viðskiptavini sína við því um síðustu helgin að reikningarnir gætu orðið háir og voru viðskiptavinirnir jafnvel hvattir til að skipta um orkusala í hraði.

Margir sem reyndu að skipta um þjónustuaðila gátu það ekki og aðrir áttu í öðrum vandræðum vegna kuldakastsins sem hefur leitt til minnst 70 dauðsfalla í Texas og nærliggjandi ríkjum og gífurlegra skemmda á innviðum.

Í frétt Dallas Morning News segir að markaðsverð rafmagnsins hafi á tíma farið upp í níu þúsund dali á megavattsstund, sem þýði að rafmagn hafi kostað níu dali á kílóvattsstund, sem við venjulegar aðstæður kosti um sjö sent og jafnvel minna.

Níu þúsund dalir var hámarksverð sem lög og reglur Texas leyfa og hélst verðið þar stóran hluta síðustu viku.

Ráðamenn í Texas, Greg Abbott, ríkisstjóri, og þingmenn, funduðu vegna málsins í gærkvöldi og segjast þeir ætla að leita lausnar og koma til móts við íbúa Texas sem hafa fengið háa reikninga.

Blaðamann DMN ræddu við Karen Cosby, sem er viðskiptavinur Griddy. Hún segist hafa slökkt á rafmagninu í húsi sínu, að einu herbergi undanskildu þar sem hún hélt til með tveimur hundum sínum. Það eina sem hún hafi gert hafi verið að keyra einn hitablásara, kaffivél á morgnanna og hitað máltíðir sínar í örbylgjuofni.

Þrátt fyrir að hitinn í húsinu hennar hafi verið um sex gráður alla frá því á mánudaginn, hafi hún fengið fimm þúsund dala reikning, eins og svo margir aðrir.

CNN ræddi við DeAndre Upshaw, sem reyndi ítrekað að skipta um orkusölu en án árangurs. Hann sat svo uppi með sjö þúsund dala rafmagnsreikning, sem er um 900 þúsund krónur. Honum tókst að komast hjá því að greiða reikninginn í bili, með því að tengja hann við kreditkort sem var ekki í notkun en segist hafa heyrt af fólki sem hafi ekki haft tök á því og bankar hafi tekið allt fé af reikningum þeirra.

Griddy er stærsta orkusala Texas. Forsvarsmenn fyrirtækisins segjast sömuleiðis vera að leita lausna fyrir viðskiptavini sína sem standa frammi fyrir þessum gífurlega háu reikningum.


Tengdar fréttir

Tugir látnir vegna kuldakastsins og marga skortir neysluvatn

Minnst 56 Bandaríkjamenn hafa dáið í vikunni vegna kuldakastsins sem gengið hefur yfir mið- og suðurríki Bandaríkjanna. Þar af bjuggu minnst þrjátíu í Texas, þar sem rafmagnsleysi hefur leikið íbúa grátt.

Sætir gagn­rýni fyrir frí á meðan vetrar­stormar ganga yfir ríkið

Þingmaðurinn Ted Cruz frá Texas-ríki fór með fjölskyldu sína í frí til Cancun í Mexíkó í gær, á sama tíma og öflugir vetrarstormar ganga nú yfir suðurhluta Bandaríkjanna. Hefur hann fengið harða gagnrýni fyrir það að fara í frí á sama tíma og ríki hans glímir við mikla erfiðleika vegna stormanna.

Verstu vetrarhörkur í manna minnum

Minnst 21 hefur látist í öflugum vetrarstormum í Bandaríkjunum. Íslensk kona í Texas segir þetta verstu vetrarhörkur sem fólk man eftir á svæðinu.

Beina spjótum sínum að umhverfisvænum orkugjöfum

Tugir milljóna Bandaríkjamanna undirbúa sig nú fyrir áframhaldandi kuldakast með tilheyrandi vetrarveðri. Fordæmalaust veður hefur gengið yfir suður- og miðhluta Bandaríkjanna á undanförnum dögum og hafa íhaldsmenn ranglega beint spjótum sínum að umhverfisvænum orkugjöfum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×