Innlent

Málin gegn Ólafi Helga og tveimur starfsmönnum felld niður

Kolbeinn Tumi Daðason skrifar
Ólafur Helgi Kjartansson, fyrrverandi lögreglustjóri á Suðurnesjum.
Ólafur Helgi Kjartansson, fyrrverandi lögreglustjóri á Suðurnesjum. Vísir/SigurjónÓ

Héraðssaksóknari hefur fellt niður mál gegn fyrrverandi Lögreglustjóranum á Suðurnesjum og tveimur starfsmönnum embættisins, saksóknarfulltrúa annars vegar og skjalastjóra hins vegar.

Þetta staðfestir Ólafur Þór Hauksson héraðssaksóknari í samtali við Vísi. Aðilar málsins hafi fengið staðfestingu þess efnis send 

Málin eru angi af hörðum deilum sem verið hafa á skrifstofu embættisins undanfarin misseri þar sem fléttast saman ásakanir um einelti, veikindaleyfi, ólögmætar uppsagnir, hallarbyltingu og tilfærslur í starfi. Lögmaður starfsmannanna tveggja fagnar niðurstöðunni.

Samkvæmt heimildum fréttastofu voru starfsmennirnir sakaðir um gagnaleka með því að hafa afhent þriðja aðila niðurstöðu fagráðs við eineltiskvörtunum þeirra. Starfsmennirnir tveir sökuðu meðal annars Öldu Hrönn Jóhannsdóttur, yfirlögfræðing á ákærusviði embættisins, og mannauðsstjóra hjá embættinu um einelti.

„Það er með öllu óþolandi að tvær saklausar konur, sem ekkert hafa til saka unnið annað en að vinna vinnuna sína, séu sakaðar um ólöglegt athæfi, þegar það blasir við öllum að þetta er hluti af miklu stærra og flóknara eineltismáli,“ segir Sara Ýrr Jónsdóttir, lögmaður kvennanna.

Saga Ýrr Jónsdóttir, lögmaður kvennanna, fagnar niðurstöðunni.Íris Dögg Einarsdóttir

„Það þurfti að hafa fyrir því, en það er ánægjuleg niðurstaða að málið sé fellt niður og ég sem verjandi fagna því fyrir hönd kvennanna tveggja að hið opinbera hafi loks áttað sig á hinum raunverulega málatilbúnaði.“

Fréttablaðið fjallaði ítarlega um málið í sumar. Þar kom fram að kvartanirnar vegna eineltis hefðu borist Ólafi Helga í byrjun júní, fagráðið tekið þær fyrir 20. júní og meintir eineltisgerendur boðaðir á fund nokkrum dögum síðar.

Ólafur var sakaður um trúnaðarbrot í starfi með því að hafa sent dómsmálaráðuneytinu bréf þar sem hann setti spurningamerki við að tveir starfsmenn embættisins, þeirra á meðal Alda Hrönn, hefðu farið í veikindaleyfi á sama tíma. Sagði hann starfsmennina hafa farið í leyfi án þess að ræða við sig. Hann hefði raunar fengið þær upplýsingar í sjálfvirku svari við tölvupósti.

Starfsmennirnir tveir og Ólafur Helgi voru kærð til héraðssaksóknara þann 1. október síðastliðinn samkvæmt heimildum fréttastofu. Þá var Grímur Hergeirsson starfandi lögreglustjóri á Suðurnesjum eftir að Ólafur Helgi lét af störfum. Ólafur Helgi starfar nú sem sérfræðingur í dómsmálaráðuneytinu.

Starfsmennirnir tveir og Ólafur Helgi voru send í launað leyfi frá störfum sínum í nóvember. Reikna má með því að þau snúi aftur til starfa nú þegar málið hefur verið fellt niður.

Háævarar deilur voru á skrifstofu Lögreglustjórans á Suðurnesjum í sumar og samstarfsörðugleikar miklir eins og fram hefur komið. Ólafur Helgi var færður úr starfinu í ágúst og Úlfar Lúðvíksson tók við því í nóvember. Auglýst var eftir nýjum mannauðsstjóra í lok október.


Tengdar fréttir

Ólafur Helgi kallaður til yfirheyrslu

Ólafur Helgi Kjartansson, fyrrverandi lögreglustjóri á Suðurnesjum og núverandi sérfræðingur í dómsmálaráðuneytinu, hefur verið kallaður til yfirheyrslu vegna rannsóknar héraðssaksóknara.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.