Erlent

Reyna að leita áfram í dag og gamall félagi kemur til aðstoðar

Kristín Ólafsdóttir skrifar
John Snorri ásamt Sadpara-feðgunum.
John Snorri ásamt Sadpara-feðgunum.

Fjölskyldur Johns Snorra Sigurjónssonar, Muhammad Ali Sadpara og Juan Pablo Mohr, sem saknað hefur verið á fjallinu K2 í um fjóra sólarhringa, hafa ákveðið að leit að þremenningunum verði haldið áfram í dag. Bresk-bandarískur fjallagarpur, sem fór á tind K2 með John Snorra í fyrra, aðstoðar nú við leitina.

Frá þessu greinir pakistanski miðillinn Dawn í morgun og hefur upp úr tilkynningu frá fjölskyldunum. Þar segir að áður en leit var hætt í gær hafi hún staðið yfir samfellt í „72 erfiðar klukkustundir“. Þá er haft upp úr tilkynningu frá samskiptadeild pakistanska hersins að leitin að þremenningunum haldi áfram í dag þegar, og ef, veður leyfi.

Þyrlur urðu frá að hverfa snemma dags í gær vegna erfiðra veðurskilyrða og skyggnis. Engin ummerki fundust um John Snorra og félaga.

Fram kemur í frétt Dawn að herinn muni nýta allan tiltækan búnað sinn til leitar í lofti og á jörðu. Erfið skilyrði séu þó til leitarinnar í dag, líkt og í gær; ský hylji fjallstoppinn og skyggni lélegt. Þrátt fyrir það verði „öllum steinum velt“. Þá greinir annar fjölmiðill frá því að reyna eigi að nota C-130 Herkúles-flugvél frá pakistanska hernum við leitina, sem komist hærra en þyrlurnar.

Vanessa O'Brien sést hér við hlið John Snorra, þar sem hann situr í neðri röð hægra megin á mynd, á K2 í fyrrasumar.Facebook

Fram kemur í yfirlýsingu frá fjölskyldum þremenninganna að þær færi öllum sem aðstoðað hafa við leitina kærar þakkir.

Þá stýri Vanessa O‘Brien, bresk-bandarískur fjallagarpur sem fór á tind K2 með John Snorra í fyrra, leitaraðgerðum í gegnum „stafrænar grunnbúðir“ frá Bandaríkjunum. Þá nýti leitarteymið gervihnattarmyndir í háskerpu við leitina. Myndirnar sýni tind fjallsins, sem þyrlur hersins ná ekki til. Daniel Leeb, einum af stofnendum Iceland Space Agency, eru færðar kærar þakkir í þessu samhengi.

PRESS RELEASE Skardu, Pakistan 8 February 2021 72-Hour K2 Search Continues Despite Worsening Weather The families of...

Posted by MUhammad Ali Sadpara Climber on Mánudagur, 8. febrúar 2021

Sajid Sadpara, sonur Ali Sadpara sem þurfti frá að hverfa úr leiðangrinum fyrir helgi, er enn í grunnbúðum K2 og hefur tekið þátt í leitinni að föður sínum og félögum hans. AP-fréttaveitan hefur eftir honum í dag að hann vonist enn eftir kraftaverki. Þá hafi faðir hans oft boðið fram krafta sína í sambærilegar leitaraðgerðir og bjargað mörgum fjallagörpum.

Fjölskylda Johns Snorra sagði í yfirlýsingu til íslenskra fjölmiðla í gær að hún væri vonlítil um að John Snorri og félagar hans séu á lífi en til þeirra sást síðast í fjallinu aðfaranótt föstudags. Erlendir miðlar hafa lýst leitinni í dag sem sérlega tilfinningaþrunginni, þar sem 34 ára afmælisdag Juan Pablo Mohr, eins þremenninganna sem saknað er, beri upp í dag.


Tengdar fréttir

„Þessir menn voru ó­trú­legar mann­eskjur“

„Ég er búinn að bíða með að skrifa þessa færslu í þeirri veiku von um að vinir mínir gætu enn verið á lífi. En það eru núna fjórar nætur síðan ég var með Ali Sadpara, John Snorra og JP Mohr í þriðju búðum á K2 og það hefur ekkert heyrst frá þeim síðan þeir lögðu af stað á toppinn.“

Vonast enn eftir kraftaverki á K2

Einn skipuleggjenda leitarinnar að fjallagörpunum John Snorra Sigurjónssyni, Ali Sadpara og Juan Pablo Mohr, sem saknað hefur verið á fjallinu K2 í rúma þrjá sólarhringa, segist enn vonast eftir kraftaverki. Hann segir mikla sorg ríkja í Pakistan vegna málsins en Ali Sadpara er einn farsælasti fjallagarpur í sögu landsins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.