Tíska og hönnun

Afhending Hönnunarverðlauna Íslands sýnd á Vísi á föstudag

Sylvía Rut Sigfúsdóttir skrifar
Tilnefningarnar til Hönnunarverðlauna Íslands verða tilkynntar hér á Vísi næstu daga.
Tilnefningarnar til Hönnunarverðlauna Íslands verða tilkynntar hér á Vísi næstu daga. Miðstöð hönnunar og arkitektúrs

Hönnunarverðlaun Íslands árið 2020 verða afhent með rafrænum hætti föstudaginn 29. janúar klukkan 11.00. Á afhendingunni verða veitt Hönnunarverðlaun Íslands, Heiðursverðlaun Hönnunarverðlauna Íslands og einnig verður veitt viðurkenning fyrir bestu fjárfestingu í hönnun ársins 2020.

Sýnt verður frá verðlaununum í streymi á samfélagsmiðlum og á Vísi.

Að verðlaununum standa Miðstöð hönnunar og arkitektúrs í samstarfi við Hönnunarsafn Íslands, Listaháskóla Íslands, Landsvirkjun, Íslandsstofu og Samtök iðnaðarins.

Það besta í hönnun og arkitektúr

Í síðustu viku tilkynntum við þau verkefni sem hlutu tilnefningu til Hönnunarverðlauna Íslands fyrir árið 2020. Að þessu sinni eru það Ýrúrarí fyrir Peysa með öllu, Studio Granda fyrir Drangar og Flothetta fyrir Flotmeðferð.

Hönnunarverðlaun Íslands varpa ljósi á mikilvægi og gæðum íslenskrar hönnunar og arkitektúrs, enda er vægi hönnunar í menningu, samfélagi og viðskiptalífi alltaf að aukast.

Flotmeðferð eftir flothettu er tilnefnd til Hönnunarverðlauna Íslands.

Hönnunarverðlaun Íslands beina sjónum að því besta sem gert er á sviði hönnunar og arkitektúrs á Íslandi um leið og einstaka hönnuðum eða hópum hönnuða er veitt mikilvæg viðurkenning.

Verðlaunin eru veitt hönnuði, arkitekt, hönnunarteymi eða stofu fyrir framúrskarandi ný verk; einstakan hlut, verkefni eða safn verka. Hönnuðir þurfa að vera félagar í einu af aðildarfélögum Miðstöðvar hönnunar og arkitektúrs eða fagmenn á sínu sviði til að hljóta verðlaunin. Ný verk eru verk sem lokið hefur verið við á síðustu tveim til þremur árum fyrir afhendingu verðlaunanna.

Framúrskarandi verk

Hönnunarverðlaun Íslands eru peningaverðlaun að upphæð 1.000.000 krónur.

Besta fjárfesting í hönnun er viðurkenning sem veitt er fyrirtækjum sem hafa hönnun og arkitekúr að leiðarljósi frá upphafi verka til að auka verðmætasköpun og samkeppnishæfi. Öll fyrirtæki sem starfa á Íslandi koma til greina.

Við val á verðlaunahafa er haft í huga að verið er að leita að framúrskarandi verki, eða safni verka, sem standa á sem fulltrúi þess besta sem gert er á sviði hönnunar og arkitektúrs. Verkið/verkin þurfa að vera einstök, fela í sér frjóa hugsun, snjalla lausn, vandaða útfærslu og fagmennsku í vinnubrögðum.

Heiðursverðlaun Hönnunarverðlauna Íslands voru veitt í fyrsta skiptið árið 2019. Heiðursverðlaun er viðurkenning veitt einstaklingi sem þykir hafa skilað framúrskarandi ævistarfi á sviði hönnunar og arkitektúrs á Íslandi. Fyrsti handhafi heiðursverðlauna var Manfreð Vilhjálmsson, arkitekt.

Peysa með öllu eftir Ýrúrarí er tilnefnt til Hönnunarverðlauna Íslands.

Dómnefndina í ár skipa:

  • Sigríður Sigurjónsdóttir formaður, Hönnunarsafn íslands 
  • Hildigunnur Sverrisdóttir, arkitekt, LHÍ 
  • Sigrún Unnarsdóttir, fatahönnuður MH&A 
  • Þorleifur Gíslason, grafískur hönnuður MH&A 
  • Paul Bennett, hönnunarstjóri IDEO, MH&A 
  • Margrét Kristín Sigurðardóttir, SI 
  • Hörður Lárusson, grafískur hönnuður MH&A 
  • Sigrún Birgisdóttir, arkitekt, LHÍ

Hér fyrir neðan má kynna sér betur verkefnin sem tilnefnd eru til Hönnunarverðlauna Íslands 2020.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.