Innlent

„Hann var einfaldlega perla þessi drengur“

Berghildur Erla Bernharðsdóttir skrifar
Guðni Heiðar Guðnason segir ótal mörgum spurningum ósvarað eftir að sonur hans, Guðni Pétur lést í Sundhöll Reykjavíkur.
Guðni Heiðar Guðnason segir ótal mörgum spurningum ósvarað eftir að sonur hans, Guðni Pétur lést í Sundhöll Reykjavíkur. Vísir

Faðir mannsins sem lést í Sundhöll Reykjavíkur á fimmtudaginn segir hann hafa verið afar hraustan og slysið skilji eftir sig ótal spurningar. Sonur hans hafi legið á botni laugarinnar í sex mínútur áður en endurlífgunartilraunir hófust. Hann segist ekki vilja finna sökudólga, aðeins fá svör.

Maðurinn sem lést hét Guðni Pétur Guðnason og var 31 árs. Hann lætur eftir sig foreldra og tvo bræður.

Guðni Pétur starfaði hjá geðþjónustu Reykjavíkurborgar og var í sundi með skjólstæðingi sínum þegar hann fannst án meðvitundar í innilaug Sundhallar Reykjavíkur. Starfsfólk laugarinnar hóf endurlífgun þegar hann fannst, þær héldu áfram í sjúkrabíl og á Landspítalanum þar til maðurinn var úrskurðaður látinn um hádegisbil á fimmtudag. 

Maðurinn fannst látinn í Sundhöllinni á fimmtudag.REykjavíkurborg

Rannsókn lögreglu á andlátinu er á frumstigi og er beðið krufningar. Í tilkynningu sem barst frá Reykjavíkurborg í dag segir að í lauginni séu öryggismyndavélar og laugaverðir hafi verið í sal og turni Sundhallarinnar.

Ekki að leita af sökudólgum

Guðni Heiðar Guðnason faðir Guðna Péturs segir hann hafa verið afar hraustan og í góðu líkamlegu formi. Hann skilur ekki hvað fór úrskeiðis.

„Ég tek skýrt fram að þó að ég spyrji  spurninga þá er ég ekki að leita af sökudólgum. Það þarf bara að svara því hvað kom fyrir drenginn okkar. Við vitum að Guðni Pétur var í sundi með skjólstæðingi sínum, honum fipast á í  lauginni eða þar gerist eitthvað sem veldur því að hann sekkur til botns,“ segir Guðni Heiðar. 

Hann segir óteljandi spurningar hafa kviknað.   

„Þessar spurningar vakna fyrst og fremst því Guðni Pétur lá svo lengi á botni laugarinnar eða í alls sex mínútur, það eru þær upplýsingar sem við höfum fengið. Þetta er mjög langur tími, svo langur að þegar við hittum lækna á gjörgæsludeild voru þeir mjög skýrir með það að ástand hans væri mjög alvarlegt, sem síðar leiddi til dauða hans. 

Spurningarnar okkar eru hver var gæslan í lauginni? Hvar voru sundlaugarverðirnir? Voru þeir í salnum? Af yfirlýsingu sem ég hef séð frá borginni þá kemur fram að þeir voru í salnum. Þá spyr ég með hverju voru þeir að fylgjast? Voru þeir að fylgjast með myndavélunum eða hvaða verkferlum áttu þeir að fylgja sem ekki var fylgt?  Voru einhverjir verkferlar brotnir?“

„Var ekki kerfi í sundlauginni sem á að gefa frá sér viðvörun ef eitthvað er hreyfingarlaust á botni laugarinnar í 15 sekúndur eða lengur. Ef slíkt kerfi var ekki til staðar þá spyr ég af hverju, því slíkt kerfi er notað annar staðar,“ segir Guðni Heiðar.

„Nú veit ég að Sundhöll Reykjavíkur er nýlega uppgerð ég spyr því var þetta kerfi ekki sett upp samhliða þeim framkvæmdum? Það er alveg ljóst í mínum huga að ef þetta kerfi hefði verið virkt eða virkað þá hefði ef til vill mátt bjarga lífi hans,“ segir Guðni Heiðar. 

Hann segist treysta rannsókn lögreglu en vill fá svör sem fyrst. 

„Ég treysti lögreglunni til að vinna sín verk eins vel og hægt er. En við viljum fá svörin sem fyrst. Hvað kom fyrir drenginn okkar?,“ segir Guðni Heiðar. 

Margir sem sakna hans

Guðni Heiðar segir að sonar síns sé sárt saknað af mörgum. 

„Guðni Pétur var mjög hraustur, hann  vildi ekki eiga bíl heldur lifði bíllausum lífsstíl og fór allra sína ferða á hjóli eða gangandi. Hann blés ekki úr nös þó hann færi langa vegalengd á hjóli.  Hann var gull að manni, manngæska í gegn, vildi engum illt, vildi öllum gott, var elskaður af okkur, vinum sínum, samstarfsfólki og skjólstæðingum. Hann var einfaldlega perla þessi drengur,“ segir Guðni Heiðar sorgmæddur að lokum. 


Tengdar fréttir

Segja lauga­verði hafa verið á sínum stað þegar slysið varð

Laugarverðir voru í sal og turni Sundhallarinnar þegar 31 árs karlmaður fannst þar á botni sundlaugar á fimmtudag, að sögn íþrótta- og tómstundasviðs Reykjavíkur. Maðurinn var síðar úrskurðaður látinn en að sögn föður hans hafði hann legið í um sex mínútur á botni laugarinnar.

Gagn­rýnir upp­lýsinga­gjöf lög­reglu um and­lát sonar síns

Guðni Heiðar Guðnason, faðir mannsins sem fannst látinn á botni sundlaugar í Sundhöll Reykjavíkur á fimmtudag, segist verulega ósáttur við að lögregla fullyrði að um veikindi hafi verið að ræða, en hann sjálfur er lögreglumaður. Hann segir son sinn hafa verið stálhraustan, enda aðeins 31 árs gamall. 

Andlát í Sundhöll Reykjavíkur

Maður sem fannst á botni sundlaugar í Sundhöll Reykjavíkur á fimmtudaginn var úrskurðaður látinn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.