Erlent

Lögðu fram frumvarp um aðra kæru gegn Trump

Samúel Karl Ólason skrifar
Stuðningsmenn Trumps hlusta á ræðu hans á baráttufundi fyrir árásina á þingið þann 6. janúar.
Stuðningsmenn Trumps hlusta á ræðu hans á baráttufundi fyrir árásina á þingið þann 6. janúar. AP/Evan Vucci

Demókratar í fulltrúadeild Bandaríkjaþings hafa lagt formlega fram frumvarp um að kæra Donald Trump, forseta Bandaríkjanna, í annað sinn fyrir embættisbrot. Það felur í sér að kæra hann sérstaklega fyrir að hvetja fólk til uppreisnar og þá fyrir hlutverk hans í því að æsa fólk upp, sem á endanum braut sér leið inn í þinghús Bandaríkjanna til að stöðva formlega staðfestingu úrslita forsetakosninganna í nóvember.

Löggæsluembætti í Bandaríkjunum hafa einnig reynt að fá út úr því skorið hvort einhverjir óeirðarseggir hafi ætlað sér að taka gísla eða valda þingmönnum og öðrum skaða.

Repúblikanar í fulltrúadeildinni stöðvuðu í dag þingsályktunartillögu um að kalla til þess að Mike Pence, varaforseti, og ráðherrar Trumps, virki 25. ákvæði stjórnarskrár Bandaríkjanna og víki Trump frá völdum. Full atkvæðagreiðsla um þá tillögu mun líklega fara fram á morgun og í kjölfar samþykktar hennar, eins og gert er ráð fyrir að verði gert, mun Pence fá sólarhring til að grípa til aðgerða, samkvæmt Nancy Pelosi, forseta fulltrúadeildarinnar.

Atkvæðagreiðsla um kæruna gæti því farið fram á miðvikudaginn. Verði hún samþykkt í fulltrúadeildinni yrði hún svo send til öldungadeildarinnar.

Fimm eru látnir vegna árásinnar. Þar af einn lögregluþjónn og kona sem var skotin til bana af löggæslumanni innan veggja þinghússins.

Kærufrumvarpið vísar sérstaklega til ítrekaðra ummæla Trumps um að hann hafi í raun unnið forsetakosningarnar í nóvember og að umfangsmikið svindl hafi kostað hann sigurinn. Embættismenn víða þvertaka fyrir það. Rannsóknir og endurtalningar hafa ekki varpað ljósi á neitt svindl af þeim skala sem Trump hefur talað um og hann og bandamenn hans hafa tapað tugum dómsmála, eða þeim verið vísað frá, í þeim ríkjum sem deilurnar snúast um.

Fyrir árásina á þingið hélt Trump baráttufund við Hvíta húsið þar sem hann gagnrýndi þingmenn og Pence harðlega. Pence var með formlegt hlutverk í því að staðfesta niðurstöðurnar og hafði sagt Trump að hann hefði ekkert vald til þess að koma í veg fyrir staðfestinguna, eins og forsetinn hafði krafist.

Trump hvatti fólk til að fara að þinghúsinu og mótmæla þessum meinta stuldi kosninganna, berjast og „bjarga landi þeirra“.

Á meðan að á árásinni á þingið stóð er Trump sagður hafa fylgst með í sjónvarpi og sendi hann út tíst þar sem hann gagnrýndi Pence frekar.

Margir óeirðarseggir kyrjuðu hástöfum: „Hengjum Mike Pence“ þegar þeir ruddu sér leið inn í þinghúsið. Á myndböndum sem tekin voru skömmu eftir tíst Trumps um Pence mátti heyra fólk nefna hann sérstaklega og vera að leita að honum. Margir leituðu einnig að Pelosi.

Sjá einnig: Lögreglan hafnaði boðum um aðstoð

Þingmenn virðast telja að ekki nái að klára kæruferlið gegn Trump áður en Joe Biden tekur við embætti þann 20. janúar. AP fréttaveitan segir þó að þingmenn séu margir þeirrar skoðunar að nauðsynlegt sé að kæra hann og ná því í gegnum þingið, til að tryggja að hann geti ekki boðið sig aftur fram til embættis.


Tengdar fréttir

Trump bað kosninga­eftir­lits­mann í Georgíu að „finna svindlið“

Donald Trump, fráfarandi Bandaríkjaforseti, hvatti kosningaeftirlitsmann í Georgíu til þess að „finna svindlið“ og sagði að hann yrði þjóðhetja ef það tækist. Þetta er þriðja skiptið sem því er lýst að Trump hafi hringt í háttsetta embættismenn í Georgíu í von um að þeir myndu snúa niðurstöðum kosninganna.

Pence verður við­staddur em­bættis­töku Biden

Mike Pence, varaforseti Bandaríkjanna, ætlar að vera viðstaddur þegar Joe Biden og Kamala Harris verða sett í embætti síðar í þessum mánuði. Fjölmiðlar vestanhafs hafa þetta eftir heimildarmanni í Washington, en Donald Trump Bandaríkjaforseti hefur sjálfur lýst því yfir að hann muni ekki vera viðstaddur innsetningarathöfnina.

Vildi „setja kúlu í hausinn á Pelosi“ í beinni

Saksóknarar í Bandaríkjunum hafa greint frá upplýsingum úr rannsókn yfirvalda, sem snýr að árás stuðningsmanna Donalds Trump Bandaríkjaforseta á þinghúsið síðastliðinn miðvikudag. Frá þessu er greint á vef CNN.

Öfgamenn áberandi í árásinni á þinghúsið

Þeir fjölmörgu óeirðaseggir sem brutu sér leið inn í þinghús Bandaríkjanna til að stöðva staðfestingu niðurstaða forsetakosninganna í nóvember í gærkvöldi eiga það flestir sameiginlegt að vera stuðningsmenn Donalds Trump, forseta Bandaríkjanna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.