Innlent

„Ég bjóst við sakfellingu“

Sylvía Hall og Nadine Guðrún Yaghi skrifa
Jóhannes S. Ólafsson, réttargæslumaður brotaþola í máli Jóhannesar Tryggva Sveinbjörnssonar.
Jóhannes S. Ólafsson, réttargæslumaður brotaþola í máli Jóhannesar Tryggva Sveinbjörnssonar. Vísir/Arnar

Jóhannes S. Ólafsson, réttargæslumaður brotaþola í máli meðhöndlarans Jóhannesar Tryggva Sveinbjörnssonar, segir þá niðurstöðu Héraðsdóms Reykjaness að dæma meðhöndlarann í fimm ára fangelsi fyrir að hafa nauðgað fjórum konum á meðferðarstofu sinni vera rétta. Niðurstaðan sé jafnframt sigur fyrir þær konur sem leituðu til lögreglu vegna hans.

„Þetta er rosalegur léttur og gleði þeirra megin að þetta hafi farið réttan veg,“ segir Jóhannes S. Ólafsson í samtali við fréttastofu. 

Niðurstaðan hafi ekki komið honum á óvart, hún sé vel rökstudd og telur hann dóminn vera réttan miðað við það sem hann hafði lesið þegar fréttastofa náði tali af honum. Dóminn má lesa hér.

„Ég bjóst svo sem ekki við neinum sérstökum árafjölda en ég bjóst við sakfellingu. Ég tel að dómurinn sé réttur og vel rökstuddur. Hann er langur og ég er ekki búinn að lesa hann allan, en miðað við það sem ég hef skimað yfir hann þá er hann vel rökstuddur og ég tel niðurstöðuna rétta.“

Steinbergur Finnbogason, verjandi Jóhannesar Tryggva, sagði í samtali við fréttastofu í dag að dómnum hafði þegar verið áfrýjað til Landsréttar. Hann væri hissa á niðurstöðu dómsins þar sem aðeins hafi verið orð gegn orði. Jóhannes segist ekki búast við því að niðurstaðan verði önnur í Landsrétti.

„Það kemur mér ekki á óvart að þeir nýti réttinn til þess að áfrýja dómnum en ég býst ekki við því að Landsréttur geri neinar sérstakar breytingar, að minnsta kosti snúi honum ekki við.“

Fullyrðingar um samræmda framburði „úr lausu lofti gripnar“ 

Steinbergur hélt því fram að brotaþolar í málinu hefðu fundað með einhverjum hætti og samræmt framburði sína. Jóhannes segir það fjarri sannleikanum, hvorki brotaþolar né vitni kannist við slíka fundi.

„Þetta er algjörlega úr lausu lofti gripið. Þeir héldu þessu fram fyrir dómi en það eru engin sönnunargögn sem styðja þetta. Það eru engir framburðir og hvorki brotaþolar né vitni í málinu kannast við þennan fund eða þessar staðhæfingar, og þeim var einfaldlega hafnað mjög afdráttarlaust af héraðsdómi í dag.“

Einkaréttarkröfur kvennanna hljóðuðuð hver og sig upp á 2,5 milljónir króna en þeim voru dæmdar bætur á bilinu ein milljón króna til 1,8 milljónir króna. Jóhannes kveðst sáttur við þá upphæð, þó vonir standi alltaf til þess að fá sem hæstar bætur fyrir umbjóðendur sína.

„Auðvitað vill maður alltaf fá sem hæstar bætur fyrir sína umbjóðendur en í ljósi dómafordæma tel ég að þetta sé nærri lagi og frekar þá í hærri kantinum miðað við dómaframkvæmd, en þetta er sérstakt mál.“

Allar konurnar sögðust hafa glímt við alvarlegar andlegar afleiðingar vegna málsins. Sú sem fékk hæstu bæturnar var talin hafa orðið fyrir meira tjóni en aðrir brotaþolar þar sem hún leitaði til Jóhannesar Tryggva vegna alvarlegra vandamála.

„Í því tilviki var það svolítið sérstakt, en hún leitaði til þessa aðila vegna sérstakra sjúkdóma sem hún var með og það voru alvarlegir sjúkdómar. Það var talið hafa aukið tjón fyrir hana að það hafi gerst í slíkri meðferð.“


Tengdar fréttir

23 konur leitað til lögfræðings

23 konur hafa nú leitað til lögfræðings vegna meðhöndlarans svokallaða sem Fréttablaðið greindi frá í síðustu viku.

Fleiri konur stíga fram vegna meðhöndlarans

Að minnsta kosti þrjár konur til viðbótar telja sig hafa orðið fyrir kynferðislegri áreitni og/eða nauðgun af hálfu manns sem meðhöndlar fólk með stoðkerfisvanda.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.