Innlent

Heilbrigðir sem lenda í sóttkví erlendis ótryggðir

Kjartan Kjartansson skrifar
Hótel í bænum Adeje á Tenerife sem var sett í sóttkví eftir að ítalskur læknir greindist með kórónuveirusmit í síðasta mánuði. Hópur Íslendinga var á meðal gesta sem þurftu að sitja í sóttkvínni.
Hótel í bænum Adeje á Tenerife sem var sett í sóttkví eftir að ítalskur læknir greindist með kórónuveirusmit í síðasta mánuði. Hópur Íslendinga var á meðal gesta sem þurftu að sitja í sóttkvínni. Vísir/EPA

Lendi íslenskir ferðalangar í sóttkví vegna kórónuveirunnar erlendis en veikjast ekki sjálfir gætu þeir þurft að standa undir mögulegum kostnaði sjálfir. Aðeins þeir sem veikjast af völdum kórónuveirunnar erlendis eiga vísan rétt á bótum frá tryggingum.

Tugir þúsunda manna hafa smitast af nýju afbrigði kórónuveiru sem kom fyrst upp í borginni Wuhan í Kína í desember og um þrjú þúsund hafa látist. Að minnsta kosti eitt smit hefur verið staðfest í fleiri en þrjátíu löndum, þar á meðal þrjú á Íslandi.

Víða hafa heilbrigðisyfirvöld skipað eða ráðlagt fólki að fara í sóttkví hafi það verið á ferð þar sem veiran er sem útbreiddust. Á Íslandi hafa yfirvöld beðið fólk sem hefur ferðast um nokkur skilgreind hættusvæði, þar á meðal Norður-Ítalíu, um að halda sig heima í fjórtán daga eftir að það yfirgefur þau.

Sjá einnig: Réttur ferðalanga vegna kórónuveirunnar ólíkur eftir aðstæðum

Þrátt fyrir að sóttvarnalæknir mæli með því að Íslendingar sleppi „ónauðsynlegum ferðalögum“ til skilgreindra hættusvæða bera þeir sem þegar hafa keypt sér far þangað kostnaðinn af því sjálfir viljir þeir hætta við. Tryggingafélög sem Vísir hafði samband við í síðustu viku sögðu þannig að ferðatryggingar bæti almennt ekki tjón fólks nema opinber höft verði sett á vegna sóttkvíar.

Þurfa að vera veik til að fá kostnað bættan

Sóttvarnalæknir bað fólk sem er á ferðalagi og finnur fyrir einkennum um að fresta heimkomu í síðustu viku. Þá voru tíu Íslendingar á meðal gesta hótels á Tenerife á Kanaríeyjum sem voru settir í sóttkví eftir að ítalskur læknir sem gisti á hótelinu greindist með kórónuveirusmit.

Réttur þeirra sem lenda í sóttkví á ferðalagi erlendis fer eftir aðstæðum og tryggingarfélagi fólks. Þeir sem veikjast af völdum veirunnar eiga rétt á bótum vegna sjúkrakostnaðar erlendis og aukins kostnaðar samkvæmt upplýsingum á vefsíðum tryggingafélaganna Varðar, VÍS og Sjóvár. Þar á meðal getur verið auka dvalar- og heimferðarkostnaður.

Staða þeirra sem lenda í sóttkví en veikjast ekki sjálfir er þrengri. Hjá hvorki Verði né Sjóvá ná tryggingar þannig yfir aukakostnað vegna sóttkvíar.

„Viðbótarkostnaður vegna sóttkvíar þegar það eru ekki nein veikindi til staðar eru því miður ekki partur af bótasviðinu. Þú þarft að vera veikur og það þarf að vera kostnaður sem tengist þeim veikindum beint,“ segir Sigurður Óli Kolbeinsson, framkvæmdastjóri tjóna- og stofnstýringar hjá Verði, við Vísi.

Á vef VÍS kemur þó fram að ef hótel fólks er sett í sóttkví og það þarf að framlengja dvöl skoði félagið hvert tilfelli fyrir sig. Fyrirtækið hvetur fólk í þeirri stöðu til að halda utan um kostnað og hafa samband við það sem fyrst.


Tengdar fréttir

Hátt í 300 manns í sótt­kví á Ís­landi vegna kórónu­veirunnar

Annar Íslendingur hefur greinst með kórónuveiruna sem veldur sjúkdómnum COVID-19. Þetta fékkst staðfest laust fyrir kl. 18:00 í dag. Einstaklingurinn er karlmaður á sextugsaldri og hafði hann verið á ferðalagi á Ítalíu en var utan skilgreinds hættusvæðis. Maðurinn er nú í heimasóttkví og er ekki mikið veikur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.