Voru leynigestir í brúðkaupi Þjóðverja á Mallorca

„Við vorum lengi að hugsa okkur um en ákváðum svo að svona boð fær maður bara einu sinni á ævinni,“ segja þau Sigríður Heiða Hallsdóttir og Þórður Björn Ágústsson sem héldu í brúðkaup þýsks pars á Mallorca í sumar sem þau höfðu hitt í mýflugumynd þegar þýski maðurinn bað konunnar á Grenivík á síðasta ári.

Sigríður Heiða og Þórður Björn voru stödd á Grenivík sumarið 2013 þegar þau heyrðu af bónorði ferðamanns á bryggjunni. Án þess að hika gripu þau gítar, gengu niður á bryggju og spiluðu og sungu lag Tom Waits, Little Trip to Heaven.

Í ljós kom að um þýskt par var að ræða og ævintýrið vatt heldur betur upp á sig þegar brúðurin tilvonandi hafði upp á þeim eftir krókaleiðum og bað þau að spila í brúðkaupi sínu á Mallorca á Spáni sem fram fór nú í sumar.

Þórður Björn segir að krakkarnir hafi komið hlaupandi inn eitt kvöldið á Grenivík og sögðu að það væri eitthvað að gerast úti á bryggju. „Það fara allir út í glugga og þá sjáum við túrista og það er eitthvað um að vera. Það eru kampavínsglös og þau eru mjög innileg.“

Sigríður Heiða segir að eitt barnanna hafi svo sagt að maðurinn hafi farið á hnén. „Ég segi þá Dodda að koma með gítarinn og taka eitt lag, gera þetta enn eftirminnilegra.“

Þórður segist hafa verið hikandi til að byrja með en Sigríði hafi tekist að draga hann út. Hann segir að það hafi ekki gengið nógu vel að flytja lagið þar sem gítarinn hafi orðið falskur á leiðinni út á bryggju. „Það endaði því á því að [Sigríður] Heiða söng restina af laginu. Það varð ekki mikið um undirspil.“

Þau Sigríður Heiða og Þórður Björn segja að Þjóðverjarnir hafi haldið að þetta hafi allt saman verið skipulagt. „Þau héldu það bæði reyndar. Hún hélt að hann hafi planað þetta og svo öfugt.“

Þau héldu utan nú í sumar og vöktu mikla lukku þegar þau birtust í þann mund er brúðhjónin sögðu frá bónorðinu ævintýralega á Íslandi og íslensku „álfunum“ sem hófu óvænt upp raust sína á bryggjunni. Eftir að þau höfðu sungið lagið var ekki þurrt auga í salnum.

Sigríður Heiða og Þórður Björn sögðu söguna af deginum örlagaríka á Grenivík og ferðinni til Mallorca í Íslandi í dag fyrr í kvöld.