Segjast hafa lagaheimild til að birta úrskurði

Innanríkisráðuneytið hefur sent frá sér yfirlýsingu varðandi frétt Fréttablaðsins um að ráðuneytið hafi birt úrskurði í útlendingamálum í heild sinni á vefnum úrskurðir.is án þess að hafa lagaheimild til þess.

Í yfirlýsingunni kemur fram að stjórnvöld hafi á grundvelli upplýsingalaga fulla heimild til þess, að eigin frumkvæði, að birta upplýsingar sem þau hafi undir höndum.

Fram kemur í tilkynningunni að sérstaklega séu nefndir til sögunnar úrskurðir sem upp hafi verið kveðnir, svo lengi sem þar sé ekki að finna upplýsingar um einka- eða fjárhagsmálefni einstaklinga sem sanngjarnt sé og eðlilegt að leynt fari og að öðru leyti gætt að lagaákvæðum er varði persónuvernd.

„Innanríkisráðuneytið hóf í síðasta mánuði birtingu úrskurða í útlendingamálum og tilkynnti um þá ákvörðun á vef ráðuneytisins 20. febrúar síðastliðinn. Með hliðsjón af framkvæmd í nágrannalöndum og að höfðu samráði við Flóttamannastofnun Sameinuðu þjóðanna var ákveðið að birta úrskurðina  á vefnum www.urskurdir.is. Þar er einnig að finna úrskurði annarra ráðuneyta og kærunefnda svo og dóma Félagsdóms,“ segir í fréttatilkynningunni.

Innanríkisráðuneytið telur að við birtingu úrskurða ráðuneytisins sé að fullu tekið tillit til persónuverndar einstaklinga.

„Í úrskurðum innanríkisráðuneytisins sem birtir hafa verið eru tekin út nöfn einstaklinga, ríkisborgararéttur þeirra eða þjóðerni, landaheiti, viðkvæmar upplýsingar, svo sem heilsufars- og fjárhagsupplýsingar sem og aðrar upplýsingar sem á einhvern hátt geta tengt einstaklinga við úrskurðinn.“

Í tilkynningunni segir einnig að úrskurðir sem hafa verið birtir varða dvalarleyfi og vegabréfsáritanir.

„Úrskurðir í hælismálum hafa ekki verið birtir. Þar er oft um mjög viðkvæmar upplýsingar að ræða og eru þeir því ólíkir úrskurðum er varða dvalarleyfi og vegabréfsáritanir. Hvernig staðið verður að birtingu úrskurða í hælismálum er til skoðunar hjá Persónuvernd,“ segir í tilkynningunni en ráðuneytið vill einnig ítreka að með birtingu úrskurða er leitast við að styrkja réttaröryggi og fyrirsjáanleika í beitingu regluverksins og stuðla að bættri málsmeðferð í málefnum útlendinga hér á landi.