Foreldrar verða boðaðir á fund

Foreldrar barna á leikskólanum 101 hafa margir hverjir leitað til Þjónustumiðstöðvar Vesturbæjar vegna ásakana um að börn hafi verið beitt ofbeldi á leikskólanum. Sigþrúður Erla Arnardóttir, framkvæmdastjóri þjónustumiðstöðvarinnar, segir málið erfitt og fyrirspurnir foreldranna ólíkar. Þá séu margir foreldrar í vandræðum með dagvistun, en ekkert laust pláss er hjá dagforeldrum á svæðinu.

„Hingað hafa leitað foreldrar og hringt og óskað eftir viðtölum eða fengið almenna ráðgjöf um það hvernig þeir geti brugðist við í þessum aðstæðum. Skóla- og frístundasvið mun boða fólk á fund og við bjóðum fyrst þeim foreldrum sem eru með börn á leikskólanum núna og í kjölfarið höldum við opinn fund fyrir þá sem hafa átt börn á leikskólanum.“

Hulda Linda Stefánsdóttir, leikskólastýra 101, segir síðustu daga hafa verið sér og öðru starfsfólki afar þungbæra. Sjálf hafi hún tekið ákvörðun um að loka leikskólanum, þrátt fyrir að hafa ekki séð umrædd myndbönd, sem hún segir jafnframt að konurnar neiti að láta af hendi.

„Þetta er rosalega alvarlegt mál og miklar og stórar ásakanir. Ég er náttúrlega bara búin að vera í andlegu áfalli en það sem ég get sagt er að ég hef ekki fengið að sjá þessi myndbönd. Ég vissi ekki af þeim. Þessar stelpur komu aldrei til mín með athugasemdir eða ábendingar og barnaverndarnefnd er ekki með myndböndin. Hún er sjálf með myndböndin, stelpan. Það fær enginn að sjá þetta sem er rosalega skrýtið í svona alvarlegum ásökunum.“

Rannsókn málsins er í fullum gangi hjá barnaverndaryfirvöldum en samkvæmt upplýsingum fréttastofu hefur málið ekki ratað á borð lögreglu.