Útskriftarnemar í MH og MR telja ferðaskrifstofur hafa brotið á sér

Hallgerður Kolbrún E. Jónsdóttir og Berghildur Erla Bernharðsdóttir skrifa 2. maí 2020 19:00

Útskriftarnemar í MH og MR telja að ferðaskrifstofur hafi brotið á sér með því að ferðaskrifstofur endurgreiði ekki pakkaferðir innan tveggja vikna eftir að farið er fram á það. Alls nema kröfurnar ríflega tuttugu milljónum króna. Formaður Neytendasamtakanna telur að neytendur eigi skýlausan rétt á slíkum endurgreiðslum samkvæmt stjórnarskrá.

170 Útskriftarnemar í Menntaskólanum í Hamrahlíð ætluðu í útskriftarferð til Krítar með Heimsferðum nú í júní. Sumir voru búnir að greiða alla ferðina aðrir að hluta, alls um tíu milljónir króna. Vegna aðstæðna hefur verið hætt við ferðina og helmingur nemenda fer fram á endurgreiðslu, aðrir ætla síðar í ferðina.

„Það er talað um að sé í vinnslu hjá gjaldkera og það eigi að bíða eftir nýjum lögum frá alþingi sem er skrítið því þegar maður biður um endurgreiðslu á maður að fá hana innan tveggja vikna,“ segir Ásgrímur Gunnarsson, oddviti útskriftarnefndar í MH.

Breki Karlsson, formaður Neytendasamtakanna, segir að tvö mál verði tekin fyrir dóm í næstu viku þar sem ferðaskrifstofur hafa neitað að endurgreiða ferðir.vísir/Egill

Hann segir þetta álag á nemendur. „Það fylgir þessu náttúrulega mikið stress sérstaklega fyrir námsmenn núna sem vita ekki einu sinni hvort þeir fái endurgreitt sem kemur þeim mjög illa.“

Útskriftarnemar í Menntaskólanum í Reykjavík eru í sömu stöðu en um 200 manns ætluðu til Mexíkó í júní og höfðu greitt staðfestingargjald til ferðaskrifstofunnar Trans-Atlantic alls um tólf milljónir. Að sögn Ingu Þóru Pálsdóttur í sjöttabekkjarráði hættu þau við og fara fram á endurgreiðslu. Í tölvupósti frá ferðaskrifstofunni vegna kröfunnar er vísað í lög og að ferðaskrifstofan telji sig ekki skuldbundna til að endurgreiða staðfestingargjaldið í heild.

Egill Örn Arnarson annar eigandi Trans-Atlantic sagði við fréttastofu í dag að endurgreiðslu hafi ekki verið hafnað að sinni. Beðið sé lagabreytinga og aðgerða ríkisstjórnar. Þá taki tíma að fá endurgreiðslu fyrir útlögðum kostnaði. Reynt sé að koma á móts við kröfur nemenda.

Formaður Neytendasamtakanna segir neytendur hafa skýlausan rétt til endurgreiðslu í svona málum.

„Við vitum af tveimur slíkum málum þar sem ferðaskrifstofurnar neita að greiða sem verða dómtekin í næstu viku. Við vitum svo sem hvernig úrskurðurinn það eru bara ferðaskrifstofurnar sem neita að greiða,“ segir Breki Karlsson, formaður Neytendasamtakanna.

Neytendur Skóla - og menntamál Faraldur kórónuveiru (COVID-19)

Tengdar fréttir

Neytendasamtökin með á annað hundrað mála í vinnslu

Málum hefur fjölgað um 70 prósent hjá Neytendasamtökunum á þessu ári og varða þau allt að 600 hundruð manns. Flestir leita þangað með endurgreiðslukröfur á fyrirtæki tengdum kórónuveirufaraldrinum.

2. maí 2020 11:15

Skilur viðskiptavini mjög vel en biðlar til fólks að vera rólegt á meðan farið er í gegnum skaflinn

Þórunn Reynisdóttir, forstjóri Úrval Útsýnar, segist mjög vel skilja þá viðskiptavini fyrirtækisins sem séu orðnir óþreyjufullir eftir endurgreiðslum vegna ferða sem ekki hefur verið farið í vegna kórónuveirufaraldursins.

28. apríl 2020 21:00

Ríkið tryggi réttindi ferðamanna

Eitt af úrræðum ríkisstjórnarinnar sem kynnt var í vikunni til að koma til móts við erfiða stöðu ferðaþjónustunnar fjallar um pakkaferðir sem hefur verið aflýst.

24. apríl 2020 11:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.