Guðrún Sóley í háskólaliði ársins

Guðrún Sóley Gunnarsdóttir, knattspyrnukona úr KR, hefur bætt enn einni fjöðrinni í hatt sinn en hún var um helgina valin í háskólalið ársins í Bandaríkjunum. Guðrún varð sem kunnugt er háskólameistari með liði sínu Notre Dame fyrir skömmu eftir æsilegan úrslitaleik við Háskólann í Kaliforníu og nú hefur þessi íslenska stúlka komist í All-American liðið vegna frammistöðu sinnar með liði sínu. Er hún þar í hópi með öllum bestu knattspyrnukonum Bandaríkjanna og þótt víðar væri leitað en það eru þjálfarasamtökin í bandaríska fótboltanum sem sjá um valið.