Kirkjan í Grafarvogi skuldar 600 milljónir

Við borgum bara og borgum en lánin bara hækka,? segir Bjarni Kr. Grímsson, formaður sóknarnefndar Grafarvogskirkju um ríflega 600 milljóna króna skuld safnaðarins. Bjarni segir skuldina tilkomna vegna byggingar Grafavogskirkju sem var vígð árið 2000. Um sé að ræða verðtryggð lán sem hækkað hafi um 150 milljónir króna eftir hrunið 2008.

Bjarni undirstrikar að skuldir Grafarvogskirkju verði að setja í samhengi við að söfnuðurinn sé sá langfjölmennasti á landinu. Í sókninni séu yfir tuttugu þúsund manns þótt aðeins sextán ára og eldri greiði sóknargjöld. Það séu nálega ellefu þúsund einstaklingar.

Að sögn Bjarna námu árstekjur Grafarvogssafnaðar í fyrra rúmum 100 milljónum króna. Þar af segir hann sóknargjöldin vera um 90 milljónir. Meira en helmingur af þessum tekjum, um 60 milljónir króna, fari til að greiða fjármagnsgjöld. Vegna þessarar erfiðu skuldastöðu fær söfnuðurinn nú 2,1 milljóna króna úthlutun frá Kirkjubyggingasjóði.

?Þetta fer að vefjast fyrir okkur þegar fjármagnsgjöldin eru rúmlega helmingur af tekjum sóknarinnar. Við höfum svo sem tjáð okkar lánardrottnum það en höfum hvorki fengið niðurfellingu skulda né annað,? segir Bjarni sem þó kveður til umræðu að breyta lánakjörum safnaðarins. Það sé þó erfitt að fá banka til viðræðna. ?Við stöndum ekki nógu illa. Við þyrftum að standa verr til að fá einhverjar afskriftir. Þetta er bara sama staða og hjá stórum hluta heimila landsins.?

Bjarni segir Grafarvogssöfnuðinn engin lán hafa tekið frá því í kring um aldamót. ?Við höfum alla tíð staðið í skilum, alltaf borgað af öllum lánum en þau bara hækka og hækka. Ætli við höfum ekki fengið um 150 milljóna króna reikning í hruninu, gróflega reiknað. Við myndum alveg vilja vera laus við það,? segir Bjarni sem kveður sóknarnefndina hafa brugðist við með niðurskurði.

?Það er ekki bara það að skuldirnar hækkuðu heldur sá ríkið ástæðu til þess að krukka í sóknargjöldin. Þannig að við erum núna með sömu tekjur í krónutölu og við vorum með 2006. Það er því einfalt mál að við höfum skorið niður. Við erum bara með það sem snýst í kring um það nauðsynlegasta, eins og guðsþjónustur og annað starf sem við getum mögulega haldið úti. Það eru allar skrautfjaðrir af okkur teknar,? segir formaður sóknarnefndar Grafarvogskirkju.

gar@frettabladid.is