Réttað yfir Hauki í þriðja sinn í sama máli

Aðalmeðferð fer fram í dag í máli ákæruvaldsins gegn Hauki Þór Haraldssyni, fyrrverandi framkvæmdastjóra hjá Landsbankanum. Þetta er í þriðja skiptið sem aðalmeðferð fer fram í málinu gegn honum, því Hæstiréttur hefur tvisvar sinnum vísað málinu heim í hérað.

Haukur Þór er ákærður fyrir að millifæra 118 milljónir króna af reikningi NBI Holdings þann 8. október 2008, í miðju bankahruni, inn á eigin reikning. Eftir fyrstu meðferð málsins var Haukur Þór sýknaður í héraðsdómi, en Hæstiréttur vísaði málinu frá. Eftir aðra aðalmeðferð var hann dæmdur í tveggja ára fangelsi. Hæstiréttur vísaði málinu þá aftur frá.