Settist á gullhnappinn og verkjaði í rassinn í viku

„Án gríns þá var ég með illt í rassinum í um viku eftir þetta atriði,“ segir Jón Jónsson, dómari í Ísland got talent, um atriði þar sem hann sest á Gullhnappinn svokallaða eftir atriði hins 23 ára Lukas Stateczuy í Ísland got talent.

Jón segist ekki vita hverju hann hafi átt að eiga von á þegar hann sá Lukas á sviðinu. „Þarna gekk maður inn með gítar og maður reiknaði með að þarna væri enn eitt „maður með gítar“ atriðið. Ekki það að það sé eitthvað að slíkum atriðum. Þau eru misfrábær og þetta fannst mér sérstaklega frábært. Hann setti inn í þetta „lúppur“ sem hann tók upp á staðnum. Þetta gekk allt saman vel upp hjá honum og það var góð stemmning í salnum,“ segir Jón.

Jón segir að þetta hafi verið gæi sem heillaði dómnefndina algerlega. „Ég ákvað að tylla mér bara á gullhnappinn. Og ég var bara með þennan verk í rófubeininu næstu daga. Það var erfitt að sitja dagana á eftir þetta en það var vel þess virði. Mér fannst atriðið það flott.“