Aðgerðir í húsnæðisvanda íbúa Kópavogsbæjar

Tillaga minnihluta bæjarstjórnar Kópavogs um að kanna kosti þess að bærinn komi að byggingu íbúða til leigu verður skoðuð. Þetta var ákveðið á fundi bæjarstjórnar Kópavogs í gær. Ármann Kr. Ólafsson bæjarstjóri Kópavogs telur hins vegar að það verði að skoða aðrar leiðir til þess að koma til móts við íbúa bæjarins með því að auðvelda þeim að kaupa sína eigin íbúð.

Ármann vill að lokinni skoðun embættismanna Kópavogsbæjar um byggingu leiguíbúða verði niðurstaðan sendi til Sambands íslenskra sveitarfélaga (SÍS) til skoðunar.

Hann vill aðkomu ríkisins og SÍS að málinu því hann er sannfærður um að það sé hægt að finna leiðir til þess að lækka byggingarkostnað við nýjar íbúðir. Hann segir að það sé vert að skoða leiðir sem gera fólki kleyft að kaupa sína eigin íbúð. Honum finnst minnihlutinn einblína of mikið á að Kópavogsbær byggi íbúðir til þess að leigja út.

Með því að henda byggingarreglugerðinni sem gerð var á síðasta kjörtímabili ríkisstjórnarinnar yrði hægt að lækka kostnað við byggingar umtalsvert. Þar á hann meðal annars við þær kröfur sem gerðar eru í byggingarreglugerðinni um stærð herbergja í hverri íbúð.

Auk þess þyrftu lífeyrissjóðirnir að koma að fjármögnun íbúða með hagkvæmari vöxtum en nú eru. Þetta séu peningar sem lífeyrissjóðirnir eru að lána. Fólkið myndi í raun mynda sér sinn eigin lífeyrissjóð með því að eignast sínar íbúðir. Lausnin sé því ekki bara að efla leigumarkaðinn.

Guðríður Arnardóttir, oddviti Samfylkingarinnar í Kópavogi, segir að tillagan sé sett fram sem viðbrögð við ástandinu á leigumarkaðinum, ástandi sem ekki sé hægt að horfa á til lengdar. Hún telur að opinberir aðilar verði að byggja upp traust á langtímaleigumarkaðnum. Þar þurfi bæði sveitarfélög og ríkið að koma að.