Blaðamannafélagið undrast afstöðu FME gagnvart blaðamönnum

Blaðamannafélag Íslands undrast að Fjármálaeftirlitið skuli telja það til forgangsverkefna að beina spjótum sínum að blaðamönnum sem eru að reyna að varpa ljósi á bankahrunið. Þetta kemur fram í ályktun sem félagið hefur sent frá sér.

„Hrunið snertir alla í landinu og varðar því ríka almannahagsmuni að upplýst sé um orsakir þess, þar með talið hvað gerðist í bönkunum. Félagið fagnar því að viðskiptaráðherra sé sama sinnis," segir í ályktun frá félaginu.

Þá segir Blaðamannafélagið að trúnaður blaðamanna sé við almenning í landinu. Ekki eigi að vera hægt að kúga fjölmiðla til að birta ekki upplýsingar sem varði hagsmuni almennings.