Kári: Gleðidagur fyrir íslenskt samfélag

Yfirtaka bandarísks lyfjarisa á Íslenskri erfðagreiningu gerir kleift að nýta erfðarannsóknir síðustu sextán ára til þess að búa til áþreifanlegan ábata fyrir heilbrigðiskerfi heimsins, segir Kári Stefánsson stofnandi fyrirtækisins. Hann býst við að starfsemin hér á landi eigi eftir að vaxa á næstu árum.

Íslensk erfðagreining hefur frá árinu árinu 2009 verið í eigu Saga Investments sem er aftur í eigu tveggja fjárfestingasjóða í Bandaríkjunum. Um síðustu mánaðarmót var fullyrt í Viðskiptablaðinu að sjóðir fyrirtækisins væru að tæmast og að tap þess í fyrra hafi numið um 1700 milljónum. Í samtali við fréttastofu á þeim tíma sagðist Kári vera rólegur yfir taprekstrinum enda væri Íslensk erfðagreining á lygnum sjó.

Klukkan eitt í dag var boðað til blaðamannafundar höfuðstöðvum íslenskrar erfðagreiningar í Vatnsmýrinni. Þar var kynnt samkomulag sem felur í sér að bandarískja líftækni- og lyfjaframleiðslufyrirtækið Amgen kaupir allt hlutafé móðurfélags Íslenskrar erfðagreiningar fyrir 415 milljónir bandaríkjadala eða um 52 milljarða íslenskra króna.

Litlar breytingar verða á starfsemi fyrirtækisins en í dag starfa um 130 manns hjá Íslenskri erfðagreiningu og munu gera það áfram.

Amgen er eitt stærsta lyfjafyrirtæki í heimi, með fjórtán þúsund starfsmenn í 43 löndum. Heildartekju þess í fyrra námu tæpum tvöþúsund milljörðum íslenskra króna.

„Þetta er gleðidagur fyrir okkur og ég held að þetta hljóti að vera gleðidagur fyrir þetta samfélag almennt. Vegna þess að hingað hefur núna komið mjög stór erlendur aðili og skilið við töluvert mikið fé til þess að kaupa íslenskt fyrirtæki," segir Kári Stefánsson.

Kári segir að um mikla lyftistöng fyrir starfsemi fyrirtækisins sé að ræða því nú sé kominn möguleiki á því að nýta erfðafræðirannsóknir síðustu sextán ára og nýta þær til þess að búa til áþreifanlegan ábata fyrir almennt heilbrigðiskerfi.

„Í annan stað þýðir þetta líka að það er komið miklu meira jafnvægi. Sem þýðir að það má búast við að ef vel gengur þá á þessi starfsemi eftir að aukast töluvert mikið á næstu árum."

„Skipulagslega er þetta mjög mikilvægt fyrir okkur. Þetta mun hafa mikil áhrif á rannsóknir okkar og vöruþróun næsta áratuginn," segir Sean Harper, yfirmaður rannsókna- og þróunar hjá Amgen.

„Ég er ekki viss um að það hafi átt sér stað meiri viðskipti með íslenskt fyrirtæki nokkurntímann," segir Kári. „Og ég held að það hljóti að geta talist góðar fréttir inn í íslenskt samfélag. Það bendir til þess að við eigum, ef við sinnum því sem skyldi, að geta búið til mikil verðmæti, bara á hugverkum einum saman. Það er gott að draga fisk úr sjó, við kunnum það, en þetta bendir til þess að við getum lært ýmislegt annað sem megi nota til að byggja undir efnahagslíf á Íslandi."

En hvað með framtíð Kára sjálfs?

„Ég kem áfram til með að vera sá sem rekur þessa einingu, að minnsta kosti á næstunni," segir Kári að lokum.