Nýr þrívídarskanni auðveldar störf lögreglunnar

Nokkur lögregluembætti á Íslandi, fyrst allra lögregluembætta á Norðurlöndunum, hafa fest kaup á þrívíddarskanna sem getur endurskapað vettvang slys eða glæps. Rannsóknarlögreglumaður segir að skanninn muni koma til með að auðvelda lögreglu mikið rannsókn mála.

Lögreglan á höfuðborgarsvæðinu, í samvinnu við embætti lögreglunnar á Vesturlandi, Norðausturlandi, Suðurlandi og Suðurnesjum, Ríkislögreglustjóra og Rannsóknarnefnd samgönguslysa, keypti skannann í upphafi árs á um 8 milljónir króna.

„Ef ég fer rétt með held ég að við séum fyrsta þjóðin í Skandinavíu sem eignumst þetta tæki. Þetta er tæki sem gerir okkur kleift búa til og raungera vettvanga sem við erum á,“ segir Guðjón Grétarsson, rannsóknarlögreglumaður.

Með því að skjóta frá sér innrauðum geislum og taka á móti þeim aftur í allt að 10 milljón punktum á mínútu býr skanninn til veröld sem er allt að 300 metrar að þvermáli. Með þessari nýju tæki er lögreglunni fært að endurskapa vettvang slysa eða glæps og ferðast um hann líkt og í raunveruleikanum.

„Helsta breytingin við að eiga þessa græju er kannski að sú góða vinna, sem þó er unnin á svona vettvöngum, verður okkur mun auðveldari. Það eykst nákvæmnin, vinnuhraðinn eykst,“ segir Guðjón

Hægt er að ferðast um stafrænu veröldina að og skoða hana frá þeim sjónarhornum sem hver vill hverju sinni. Þá er unnt að gera mjög nákvæmar mælingar.

„Við erum tilbúin hvenær sem, 24 tíma sólarhrings, að fara hvert á landinu sem er með þetta tæki ef óskað er eftir því. Við reynum að komast eins fljótt og hægt er áður en það verður mikil hreyfing á vettvangnum og reynum að taka hann upp eins og hann er strax eftir slysið. Þá skilum við af okkur afurð mjög nákvæm.“

Koma með vettvanginn í dómsal

Vettvangurinn er svo varðveittur og má nota eins lengi og þörf er á. Guðjón segir að í framtíðinni muni stafræni vettvangurinn nýtast fyrir dómi.

„Ekki endilega að fara á vettvanginn, eins og gert er í dag í sumum málum, í svokallaða vettvangskönnun heldur komum við með vettvanginn í dóminn,“ segir Guðjón.

Lögreglan er nú þegar byrjuð að nota skannann.

„Við höfum farið í nokkur mál; umferðarslys, bruna og höfum verið að prófa okkur áfram þar en lærdómsferlið er svona í gangi og hefur verið undanfarinn mánuð,“ segir rannsóknarlögreglumaðurinn Guðjón Grétarsson.