Enski boltinn

Margfaldur meistari með Man. United talaði eftir leikinn um eitrað andrúmsloft á Old Trafford

Óskar Ófeigur Jónsson skrifar
Ole Gunnar Solskjær, Phil Jones og David De Gea ganga á velli á Old Trafford í gær á meðan stuðningsmenn félagsins baula á þá.
Ole Gunnar Solskjær, Phil Jones og David De Gea ganga á velli á Old Trafford í gær á meðan stuðningsmenn félagsins baula á þá. Getty/Alex Livesey

Það er óhætt að segja að tap Manchester United í gærkvöldi á heimavelli á móti Burnley hafi farið illa í bæði stuðningsmenn félagsins sem og nokkra knattspyrnusérfræðinga.

Það var baulað á leikmenn Manchester United þegar þeir gengu af velli eftir leikinn. Manchester United er sex stigum frá Meistaradeildarsæti eftir þetta tap á Old Trafford en liðið fékk þar fínasta tækifæri til að nýta sér það að Chelsea tapaði stigum í gær.

Breska ríkisútvarpið tók það saman sem stuðningsfólk og sérfræðingar voru að segja um Manchester United liðið eftir þetta vandræðalega kvöld fyrir félagið.



Darren Fletcher, fimmfaldur Englandsmeistari með Manchester United, talaði um að eftir þessi slæmu úrslit væri andrúmsloftið orðið eitrað á Old Trafford.

„Þessar senur á leikvanginum voru ekki góðar. Söngvarnir og svo er andrúmsloftið orðið eitrað í fyrsta sinn,“ sagði Darren Fletcher við breska ríkisútvarpið.

Þetta var í fyrsta sinn sem Burnley vinnur á Old Trafford í ensku úrvalsdeildinni og síðan að Ole Gunnar Solskjær var fastráðinn hefur United liðið nú tapað fleiri deildarleikjum (12) en það hefur unnið (11).

Liðið er í fimmta sæti heilum 30 stigum á eftir toppliði Liverpool og Liverpool á einnig tvo leiki til góða á erkifjendur sína.

„Eins og er þá sérðu þessa ungu leikmenn bara sökkva neðar og neðar við hvert mótlæti. Allt sem þeir gera er undir smásjá og það er mikil pressa á þessum krökkum. Það var erfitt fyrir mig að koma inn í Manchester United liðið á sínum tíma en ég var umkringdur heimsklassa leikmönnum hægri, vinstri,“ sagði Darren Fletcher í þessu viðtali við BBC Radio 5 Live.

„Strákarnir hafa ekki sama stuðningsnet í kringum sig og þetta er mjög erfitt fyrir þá. Það herðir kannski nokkra þeirra en líklega mun þetta buga nokkra líka sem eru vonbrigði,“ sagði Fletcher.



Stuðningsmenn Manchester United beindu pirringi sínum í leiknum gegn Ed Woodward og Glazer fjölskyldunni sem á félagið. Ian Dennis, blaðamaður á BBC var hneykslaður á því sem þeir sungu um.

„Ég verð að segja að söngvar stuðningsmanna Manchester United voru skammarlegir. Sama hvaða álit þú hefur á Ed Woodward þá getur ekki beðið einhver um að deyja. Ef þú ert á móti stjórninni þá syngdu um að það þurfi að reka hana en það er hneyksli að þeir hafi sungið þetta um manneskju,“ sagði Ian Dennis.

Rio Ferdinand, sexfaldur Englandsmeistari með Manchester United, talaði um vandræðalegt kvöld fyrir félagið. „Ég get ekki komið þessu til varnar. Ungir krakkar í skólum landsins munu ekki klæðast Manchester United treyjum lengur. Þeir vilja ekki koma hingað til að styðja Manchester United miðað við það sem liðið er að bjóða upp á. Að sjá síðan stuðningsfólk yfirgefa völlinn eftir 84 mínútur,“ sagði Rio Ferdinand og bætti við.

„Þetta er vandræðalegt. Fólk í valdastöðum innan félagsins þurfa að átta sig á því að eitthvað þarf að breytast. Við þurfum að fá að vita hvað sé í gangi því ég sé það ekki í dag,“ sagði Rio Ferdinand en það má lesa meira hér.

Enski boltinn

Mest lesið


Fleiri fréttir

Sjá meira


×

Mest lesið