Innlent

Óhreinsað skólp fer nú út í sjó eftir að Reykvíkingar hunsuðu tilmæli

Eiður Þór Árnason skrifar
Fráveitustöð í Klettagörðum í Reykjavík.
Fráveitustöð í Klettagörðum í Reykjavík. Veitur/Mats Wibe Lund

Hreinsistöð fráveitu við Klettagarða er nú óstarfhæf og fer óhreinsað skólp í sjó. Að sögn Veitna er ástæðan gríðarlegt magn af blautklútum, þar á meðal sótthreinsiklútum, í fráveitukerfinu í Reykjavík. Umrædd hreinsistöð tekur við skólpi frá norður- og austurhluta Reykjavíkur.

„Svo virðist sem magn slíkra klúta, sem hent er í salerni, hafi aukist margfalt undanfarna daga og hefur það skapað mikið álag á allan búnað hreinsistöðva og starfsfólk,“ segir í tilkynningu frá Veitum.

Síðast fyrir helgi hvatti fyrirtækið fólk til þess að henda alls ekki rusli á borð við blautklúta í klósett. Þá var gífurlegt magn af rusli sagt berast í hreinsistöðvar og farið að bera á miklu álagi. Ekki er að sjá að þau tilmæli hafi borið tilskilinn árangur.

Nú er svo komið að stöðva hefur þurft dælur og er verið að hreinsa þær og annan búnað stöðvarinnar. Mikil vinna og kostnaður hlýst af því að hreinsa dælur og farga ruslinu.

„Við hvetjum fólk til að nota ekki klósettin sem ruslafötur. Blautklútar, hvort sem þeir eru notaðir á andlit og líkama eða til þrifa og sótthreinsunar, eiga heima í ruslinu,“ segir í tilkynningu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×