Birgir Svan Símonarson látinn

Birgir er íslenskum ljóðaunnendum að góðu kunnur. Hann vakti mikla athygli með bókunum sínum Nætursöltuð ljóð og Hraðfryst ljóð og ljóðinu Geggjaður ástaróður sem margir þekkja úr kennslubókum um íslenska ljóðlist. 

Birgir var hluti af skáldahópnum Listaskáldunum vondu ásamt Sigurði Pálssyni, Megasi, Steinunni Sigurðardóttur og fleirum sem slógu í gegn, ferðuðust um landið, lásu ljóð og ögruðu góðborgurum og gagnrýnendum. Birgir gaf út yfir 20 ljóðabækur á löngum ferli en skilur einnig eftir sig safn barnabóka, örsagna, þriggja línu ljóða og þýðinga. Meðfram ritstörfum starfaði Birgir sem sjómaður og síðar kennari og deildarstjóri í Kópavogi. 

Birgir barðist við krabbamein í meira en áratug og lést á líknardeild Landspítalans í Kópavogi á jóladag 25. desember.