Innlent

Synti út úr skriðunni eftir að hafa bjargað manni úr björgunar­sveitar­bíl

Sylvía Hall og Sunna Karen Sigurþórsdóttir skrifa
Davíð Kristinsson björgunarsveitarmaður.
Davíð Kristinsson björgunarsveitarmaður. Vísir

„Ég sé skriðuna fara af stað. Hún byrjar að renna niður. Ég horfi niður og þar sé ég björgunarsveitarbíl sem var við lokunarpóst, sem ég veit að mun lenda í skriðunni. Eftir það sé ég bara björgunarsveitarbílinn. Þó svo að hús hafi farið fram hjá á sama tíma þá sá ég aldrei húsið, ég sá bara björgunarsveitarbílinn því ég vissi að hann væri mannaður.“

Svona lýsir björgunarsveitarmaðurinn Davíð Kristinsson aurskriðunni sem féll síðdegis á föstudag. Hann var því bersýnilega staddur nærri skriðunni þegar hún féll og þurfti að hlaupa af stað til þess að bjarga félaga úr bílnum.

Davíð ræddi við fréttamann okkar á Seyðisfirði í dag.

Klippa: Sá skriðuna stefna beint á björgunarsveitarbílinn

„Ég sé björgunarsveitarbílinn þannig ég stekk inn á skriðuna og næ að komast að björgunarsveitarbílnum – næ að opna hurðina á honum og ná manninum út,“ segir Davíð.

„Við náum að synda út úr skriðunni saman.“

Þurfti að tryggja að fólk færi rétta leið 

Að sögn Davíðs tók við mikill ótti, enda ljóst að gífurlegt tjón hafði orðið vegna skriðunnar. Fjölmörg hús skemmdust og tók skriðan nokkur með sér nokkra metra.

Það hafi því verið fyrsta verk að rýma svæðið og ná yfirsýn yfir aðstæðurnar svo hægt væri að stýra fólki út af svæðinu á öruggan máta. Það skipti sköpum að fólk færi rétta leið.

„Það skapaðist náttúrulega ótti og ég er ótrúlega þakklátur fyrir það hversu margir nenntu að taka mark á mér og hlustuðu á þau skilaboð sem ég gaf. Það var ótrúlega mikið af öflugu fólki þarna sem var hægt að gefa skilaboð.“

Hann segir mikið af öflugu fólki hafa lagst á eitt.

„Það má ekki misskiljast að ég hafi gert eitthvað meira en næsti maður, þetta er bara mitt upplivelsi og svona upplifði ég þetta.“

Loftmyndir frá Seyðisfirði sýna greinilega þá eyðileggingu sem orðið hefur.Vísir/Egill

Stórt verkefni fram undan

Davíð segir næstu daga líta þokkalega út. Það sé farið að kólna aðeins í veðri og engin ástæða til annars en að líta björtum augum á framhaldið.

„Þeir líta bara vel út. Það er farið að snjóa aðeins sýnist mér, þá eru jólin að koma. Þetta lítur allt vel út.“

Nú hefur rýmingu verið aflétt fyrir hluta Seyðisfjarðar og því ljóst að einhverjir fá að snúa aftur heim. Enn er hætta á skriðuföllum á öðrum svæðum og verður rýming áfram í gildi þar. Viðbúnaður hefur verið færður af neyðarstigi niður á hættustig.

Stórt verkefni sé fram undan en öflugur mannskapur er á svæðinu, sem Davíð segir hjálpa gífurlega.

„Næstu verkefni eru líklega að reyna að koma fólki inn í bæinn að ná í sína hluti og taka stöðuna.“


Tengdar fréttir

„Ef maðurinn minn hefði hlaupið í hina áttina þá væri hann ekki hér með okkur“

Hildur Þórisdóttir, mannauðsstjóri og fyrrum forseti bæjarstjórnar á Seyðisfirði, segir það vera kraftaverk að ekkert manntjón hafi orðið þegar aurskriðan féll í gær. Bjarki Borgþórsson, lögreglumaður og eiginmaður Hildar, var staddur nærri staðnum sem skriðan féll ásamt öðrum viðbragðsaðilum og mátti litlu muna að verr færi.

Rýmingu af­létt að hluta á Seyðis­firði og bærinn kominn á hættu­stig

Ofanflóðasérfræðingar Veðurstofu Íslands og samstarfsaðilar hafa metið hættu á frekari skriðuföllum á Seyðisfirði. Þeir íbúar sem búa utan áhættusvæða mega snúa aftur til Seyðisfjarðar í dag. Viðbúnaðarstig á Seyðisfirði hefur verið af neyðarstigi niður á hættustig.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×