Innlent

Lýsa yfir vantrausti á skipstjóra sinn

Kolbeinn Tumi Daðason skrifar
Við sýnatöku eftir þrjár vikur á sjó reyndust 22 af 25 skipverjum Júlíusar Geirmundssonar smitaðir af kórónuveirunni eða með mótefni við henni. Skipið hélt aftur á haf út áður en niðurstöður lágu fyrir en sneru í kjölfarið aftur í land.
Við sýnatöku eftir þrjár vikur á sjó reyndust 22 af 25 skipverjum Júlíusar Geirmundssonar smitaðir af kórónuveirunni eða með mótefni við henni. Skipið hélt aftur á haf út áður en niðurstöður lágu fyrir en sneru í kjölfarið aftur í land. Vísir/Hafþór

Skipverjar á togaranum Júlíusi Geirmundssyni hafa lýst yfir vantrausti á skipstjórann Svein Geir Arnarsson. Samkvæmt upplýsingum fréttastofu ákváðu skipverjar sem nú eru á sjó, úr áhöfninni sem var í landi þegar hin veiktist á túr í október, að lýsa yfir vantrausti í kjölfar nýlegrar yfirlýsingar Sveins Geirs skipstjóra í fjölmiðlum.

RÚV greindi fyrst frá málinu í kvöld og vísaði til bréfs sem fjölmiðillinn hefur undir höndum. Í bréfinu mun vera farið fram á að skipstjórinn hætti störfum. Hann er annar tveggja skipstjóra á Júlíusi Geirmyndssyni og sá sem stóð í brúnni þær þrjár vikur sem frystitogarinn var á sjó í október með 22 skipverja smitaða af Covid-19.

Fréttastofa hefur ekki upplýsingar um hve margir af skipverjunum um borð skrifuðu undir bréfið. Málið mun vera afar viðkvæmt. Sveinn Geir er alla jafna skipstjóri þessarar áhafnar en er nú í landi þar sem skipstjórarnir skiptu á túrum fyrir hinn umtalaða túr þar sem hópsýkingin kom upp.

Með réttarstöðu sakbornings

Sveinn Geir sagðist í yfirlýsingu til fréttastofu um helgina vera með stöðu sakbornings í rannsókn lögreglu á hópsmiti sem kom upp um borð í togaranum. Hann sakar stéttarfélag sitt og áhafnarinnar um að ætla að halda „sýndarréttarhöld“ yfir sér með sjóprófi.

Ákveðið hefur verið að sjópróf skuli fara fram vegna hópsýkingarinnar um borð í togaranum. 22 úr 25 áhöfn greindust smitaðir eða með mótefni fyrir kórónuveirunni. Skipið hélt áfram veiðum í þrjá vikur þrátt fyrir að skipverjar hefðu veikst snemma í túrnum.

Í yfirlýsingu Sveins Geirs, sem hefur að öðru leyti ekki viljað tjá sig um atburðina um borð, kemur fram að hann hafi stöðu sakbornings. Hann hafi veitt lögreglu allar upplýsingar sem hún hafi óskað eftir. Lögregla hafi þannig undir höndum afrit af skipsdagbók og þá hafi hann gefið skýrslu í málinu.

„Bíð ég nú sem sakaður maður eftir niðurstöðu lögreglurannsóknar, en ég vænti þess að þar muni ég njóta sannmælis og réttlátrar málsmeðferðar eins og lög bjóða,“ segir í yfirlýsingunni sem lögmaður Sveins Geirs sendi fyrir hönd hans til Vísis.

Segir félögin vilja auðmýkja sig opinberlega

Skipstjórinn fer hörðum orðum um verkalýðsfélag sitt og áhafnarinnar en þau kærðu Hraðfrystihúsið Gunnvör vegna meðferðar þess á áhöfn Júlíusar Geirmundssonar og kröfðust sjóprófs. Verkalýðsfélag Vestfjarða, Félag skipstjórnarmanna, Sjómannafélag Íslands, Sjómannasamband Íslands og VM - félag vélstjóra og málmtæknimanna standa að kærunni.

Sakar Sveinn Geir félögin um að ætla að halda „opinber réttarhöld“ yfir sér og „opinberlega smána“ sig.

„Ekki þarf að spyrja að því hvernig sá dómur verður, enda hafa þau þegar fellt hann. Ég frábið mér sýndarréttarhöld og opinbera auðmýkingu í boði stéttarfélags míns og mun ekki taka þátt í þeim,“ segir Sveinn Geir í yfirlýsingu sinni.

Segist hann tilbúinn að ræða við félögin um leiðir til þess að bæta öryggi sjómanna ef markmiðið sé samvinna en ekki að „smána og niðurlægja opinberlega“.

Þungbært að sitja undir ásökunum

Hafnar skipstjórinn því í yfirlýsingu sinni að hann hafi stofnað áhöfninni í hættu viljandi eða neytt veika menn til að vinna. Honum hafi verið þungbært að komast að því að smitin sem komu upp um borð hafi verið kórónuveirusmit.

Þá sé honum þungbært að sitja undir ásökunum og kærum.

„En ég mun ekki víkja mér undan ábyrgð í málinu og ég get gert mistök eins og aðrir menn,“ segir Sveinn Geir sem ætlar ekki að tjá sig frekar á meðan lögregla rannsakar málið.

Einar Valur Kristjánsson, framkvæmdastjóri Hraðfrystihússins Gunnvarar, sagði að réttum verkferlum hefði ekki verið fylgt þegar veikindin komu upp um borð í togaranum í síðasta mánuði.

„Ég get ekki útskýrt það. Það er eiginlega ekki hægt að útskýra það. Það hefði verið rétt að fara í land en þetta var bara svona,“ sagði Einar Valur þegar hann var spurður út í fréttir um að skipstjórinn hefði sett skipverja í einangrun í þrjá daga og jafnvel saman í káetu.


Tengdar fréttir

Sjó­próf vegna hóp­smitsins á Júlíusi Geir­munds­syni

Ákveðið var að sjópróf skyldi fara fram vegna hópsýkingar kórónuveiru um borð í togaranum Júlíusi Geirmundssyni þegar mál vegna þess var þingfest í Héraðsdómi Reykjaness í dag. Stéttarfélög áhafnarinnar fóru fram á sjópróf.

Stéttarfélög áhafnarinnar kæra til lögreglu og krefjast sjóprófs

Stéttarfélög áhafnarinnar á Júlíusi Geirmundssyni ÍS 270 hafa ákveðið að kæra framgöngu Hraðfrystihússins Gunnvarar til lögreglu vegna meðferðarinnar á skipverjunum í síðasta veiðitúr togarans. Stéttarfélögin vilja að sjópróf verði haldin.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.