Undir­búningur að bólu­setningu að hefjast

Sóttvarnalæknir vonast til að hægt verði að byrja að bólusetja fyrstu Íslendingana gegn kórónuveirunni fljótlega eftir áramót ef samningar takast um kaup á bóluefni. Hann hvetur fólk þó til að stilla væntingum í hóf. Þá segir hann undirbúning að bólusetningu á Íslandi að hefjast.

Lyfjafyrirtækin Pfizer og BioNTech tilkynntu í gær að bóluefni þeirra gæfi góða raun – um 90 prósent vörn gegn kórónuveirunni miðað við fyrstu niðurstöður. Sérfræðingar sem fréttastofa hefur rætt við eru flestir bjartsýnir á fréttir af þróun bóluefnisins en fyrirtækin sjálf hafa gefið út að vonir séu bundnar við að hægt verði að hefja fyrstu bólusetningar í lok árs.

Horfir jafnvel til ársbyrjunar 2021 ef samningar nást

Þórólfur Guðnason sóttvarnalæknir segir þetta ánægjulegar fréttir. Hann bendir þó á að eftirlitsstofnanir eins og Lyfjastofnun Evrópu eigi eftir að fara yfir niðurstöðurnar.

„Og svo þurfum við bara að vera með í samningum Evrópusambandsins við Pfizer þannig að við getum tryggt okkur bóluefni eins fljótt og hægt er,“ segir Þórólfur.

Þá segir hann erfitt að segja til um það nákvæmlega hvenær farið verði að dreifa bóluefninu. Hann bendir þó á að fyrirtækin segist ætla að framleiða um fimmtíu milljónir skammta á þessu ári og miklu fleiri á því næsta. Hann horfi því jafnvel til ársbyrjunar 2021.

„Ef samningar takast við Evrópusambandið, þar sem við erum hluti af því, þá vonast ég til að við getum fengið einhverja skammta fljótlega í byrjun næsta árs.“

Þannig að vonandi gætum við bólusett fyrstu Íslendinga í byrjun næsta árs?

„Maður hefur ekkert fyrir sér í því en auðvitað hefur maður vonir um það, ef allt gengur vel. En ég held að við eigum ekki að vera að hefta okkur í slíka tímasetningu of snemma. Ég held við þurfum að anda aðeins djúpt, sjá hvað gerist, og stilla væntingum í hóf. Ég held að það sé best.“

Undirbúningur að fara af stað

Þá telur Þórólfur að það ætti ekki að taka svo langan tíma að bólusetja Íslendinga. Það fari þó allt eftir því hvernig þurfi að meðhöndla bóluefnið, hvernig það geymist og við hvaða aðstæður.

„En við erum að fara af stað með undirbúning að bólusetningum núna og það þarf að mörgu að hyggja varðandi framkvæmdina þegar að því kemur, skráningu og dreifingu og slíkt. Og ég geri mér vonir um að við veðrum búin að ljúka því núna fyrir lok þessa árs, fyrir áramót, og þá eigum við að vera í startholunum og geta gert þetta eins fljótt og hægt er þegar bóluefnið kemur.“

Þórólfur segir þróunina í bóluefnismálum á „svipuðu plani“ og talað hafi verið um í nokkurn tíma. Hann segir þó að alltaf geti komið bakslag.

„En það geta líka komið ánægjulegar fréttir um að bóluefni verði tilbúið, jafnvel fyrr en vði áætluðum, þannig að ég held að við verðum bara að vera undir það búin.“

Ellefu greindust með kórónuveiruna innanlands í gær og hafa ekki verið færri í um tvo mánuði. Inntur eftir því hvort hann sjái fyrir sér að leggja til að veirutakmörkunum verði létt segir Þórólfur þróunina ánægjulega en að við þurfum að gæta okkar áfram. Létta þurfi mjög hægt á aðgerðunum til að fá ekki bakslag í faraldurinn. Þá kveðst hann ekki tilbúinn með næsta minnisblað til heilbrigðisráðherra eins og staðan er nú.