„Eins og veikindin séu ekki nóg"

Ráðuneyti vísa á hvort annað eða á sveitarfélag þaðan sem engin svör fást í máli konu með MS- sjúkdóminn sem hefur verið á stofnunum í tæpt ár vegna úrræðaleysis í húsnæðismálum. Baráttan við kerfið er farið að taka á heilsu konunnar.

Við sögðum í október  frá máli Margrétar Sigríðar Guðmundsdóttur sem er með MS taugasjúkdóminn og hefur verið í bráðabirgðavistun á vegum hins opinbera frá því í janúar.  Síðan þá hefur hún og aðstandendur hennar reynt á árangurs að fá viðeigandi húsnæðisúrræði fyrir hana. 

Fréttastofa hefur óskað eftir svörum frá ráðuneytum og stofnunum frá því mál hennar var til umfjöllunar ó október en þar virðist hver vísa á annan og engin endanleg lausn vera í sjónmáli. Þá hafa aðstandendur ítrekað reynt að fá húsnæðisúrræði fyrir Margréti.

Sjúkratryggingar vona eftir lausn sem fyrst 

Aðstandandi Margrétar  sendi Sjúkratryggingum erindi 6. október um hvort hún fengi fjármagn þaðan til að fá inni á hjúkrunarheimili þar sem biðin hafi mjög slæm áhrif á heilsu hennar.

Í svari Sjúkratrygginga frá 16. október kemur fram að vonast sé eftir lausn sem fyrst.

Heilbrigðisráðuneyti vísar á félagsmálaráðuneyti

Fréttastofa leitaði svara hjá heilbrigðisráðuneytinu vegna máls konunnar og fékk þau svör að það væri skýr stefna að styðja slíka einstaklinga til búsetu á eigin heimili.

Þá var vísað á félagsmálaráðuneytið sem hafi eftirlit með að sveitarfélög fari að lögum í málaflokknum.

Félagsmálaráðuneytið vísar á heilbrigðisráðuneyti

Í svari félagsmálaráðuneytisins vegna fyrirspurnar fréttastofu um mál konunnar var vísað á að  málefni hjúkrunarheimila heyrir undir málefnasvið heilbrigðisráðuneytisins,

Sveitarfélög beri ábyrgð á skipulagi og framkvæmd þjónustu við fatlað fólk

Þá kom fram að mál einstaklingsins sé nú í sérstakri skoðun hjá Kópavogsbæ.

Sjúkratryggingar vísa í samning

Sjúkratryggingar svöruðu fréttastofu að ef einstaklingur, sem býr á hjúkrunarheimili, þurfi á sérhæfðri þjónustu að halda sé greitt sérstakt gjald fyrir hana á grundvelli gildandi samnings hverju sinni. 

Engin svör frá Kópavogsbæ

Kópavogsbær hefur ekki svarað endurteknum fyrirspurnum fréttastofu um úrræði fyrir konuna þrátt fyrir að hafa gefið út í október að bærinn ætli eftir bestu getu að verða viðkomandi úti um þjónustu.

Eiga ekki allir rétt á heimili?

Margrét sem hefur verið í hvíldarinnlögn í bráðabirgðavistun á Droplaugastöðum síðan í ágúst, átti að flytja í bráðabirgðavistun Vífilstaði næstkomandi sunnudag þar sem ekkert húsnæði hefur fengist fyrir hana. Hún  fékk að vita í dag að hún fær að vera áfram á Droplaugastöðum fram yfir jól. 

Margrét klökknaði í dag þegar fréttastofa hitti hana til að spyrja út í hvort eitthvað hafi gerst í húsnæðismálum hennar.  Hún segir enga endanlega lausn fyrir sig í sjónmáli.

„Ég hef verið á vergangi, heimilislaus í tíu mánuði, óskráð í hús, lagið þetta," segir Margrét sem beinir orðum sínum til stjórnvalda.

Alexandra Sif Herleifsdóttir hefur áhyggjur af mömmu sinni. 

„Þessi óvissa er engum holl, þetta er alveg glatað allt þetta ferli. Það er erfitt að horfa uppá fjölskyldumeðlim ganga í gegnum svona óvissu. Eins og veikindin séu ekki nóg. Hún þarf að berjast við kerfið og fara í fjölmiðla til að fá fram sjálfsagðan rétt sinn að eiga heimili, eiga ekki allir rétt á því? Hún á ekki heima neins staðar,“ segir Alexandra.