Manchester United er aftur á sigurbraut eftir 4-1 sigur á Newcastle United í ensku úrvalsdeildinni í kvöld.
Þetta byrjaði ekki vel fyrir Man Utd þegar Luke Shaw skoraði sjálfsmark strax á 2. mínútu leiksins og kom Newcastle yfir.
Fyrirliðinn Harry Maguire sem legið hefur undir harðri gagnrýni undanfarið sýndi sitt rétta andlit og jafnaði metin fyrir Rauðu Djöflanna á 23. mínútu með góðum skalla eftir hornspyrnu.
Staðan í hálfleik var 1-1 en á 58. mínútu fengu Man Utd vítaspyrnu. Bruno Fernandes fór á punktinn en þá gerðist það í fyrsta skipti að hann klúðraði vítaspyrnu í rauðum búningi United.
Allt stefndi í jafntefli en sú varð heldur betur ekki raunin. Bruno Fernandes kom Man Utd yfir á 86. mínútu eftir góðan undirbúning frá Marcus Rashford. Rashford átti síðan aðra stoðsendingu sína í leiknum þegar hann lagði upp mark fyrir Aaron Wan-Bissaka, fyrsta mark hans fyrir Manchester United, á 90. mínútu.
Undir blálokin þegar uppbótartíminn var liðinn skoraði Rashford síðan sjálfur og gulltryggði góðan 4-1 sigur Rauðu Djöflanna, heldur betur góð lyftistöng fyrir þá eftir dapra byrjun á tímabilinu.
Eftir leikinn er Manchester United í 14. sæti með sex stig en liðið hefur spilað leik minna en flest önnur lið deildarinnar. Newcastle er í 11. sæti með sjö stig.
