Æ fleiri forstjórar stórfyrirtækja efast um gagnsemi háskólamenntunar

Það vakti athygli á dögunum þegar Elon Musk sagði í ræðu á ráðstefnunni Satellite 2020 að háskólagráða væri engin ávísun á betri starfsframa. Sagði Musk háskólanám tilvísun í skemmtilegan tíma frekar en þörf fyrir atvinnulífið, enda væri háskólamenntun engin trygging fyrir vinnuveitendur um hæfni eða getu starfsfólks. Í ræðu sinni benti Musk á að bæði Bill Gates og stofnandi Oracle, Larry Ellison, hefðu báðir hætt í háskóla á sínum tíma.

Með þessu bættist Musk við hóp fleirri forstjóra stórfyrirtækja sem hafa á síðustu misserum velt fyrir sér raunverulega þörf háskólamenntunar fyrir atvinnulífið. Google og Apple eru dæmi um stórfyrirtæki sem ekki krefjast háskólamenntunar við ráðningu í störf.

Hjá Apple eru til dæmis aðeins um helmingur starfsfólks með háskólagráðu. Þetta segir Tim Cook, forstjóri Apple, einfaldlega skýrast af því að fólk með háskólamenntun er ekkert endilega betur til þess fallið að leysa úr þeim verkefnum sem fyrirtækið er að vinna að.

Forstjóri Siemens, Barbara Humptons, hefur haft uppi svipaðar vangaveltur. Segir hún of algengt að verið sé að krefjast háskólamenntunar í starfslýsingu, án þess að háskólagráða nýtist starfinu að nokkru leyti öðru en því að flýta fyrir úrvinnslu umsókna hjá ráðningaraðilum. Í greiningu sem unnin var af LinkedIn er því haldið fram að þeim fari fjölgandi eftirsóttum vinnustöðum sem ekki fara fram á háskólagráðu þegar ráðið er í störf.

„Gjáin“ að myndast?

Í umfjöllun Atvinnulífsins á Vísi í september hefur verið fjallað um þá gjá, eða þekkingareyðu, sem mögulega er að myndast í atvinnulífinu þar sem tækniframfarir fjórðu iðnbyltingarinnar eru svo hraðar að starfsfólk hefur ekki þá þekkingu sem til þarf til að fylgja eftir öllum breytingum.

Í nýlegu viðtali sagði Martha Árnadóttir framkvæmdastjóri Dokkunnar svarið við þessu vera símenntun sem vinnustaðir þyrftu að leggja áherslu á og það sem fyrst, þannig að ekki kæmi til skortur á vinnuafli með þá þekkingu sem til þarf.

Fyrirtæki standa frammi fyrir því að starfsfólk mun ekki hafa þá þekkingu sem til þarf til að fylgja eftir öllum breytingum sem eru að verða á störfum og fyrirtækjarekstri í kjölfar fjórðu iðnbyltingarinnar,“ 

sagði Martha.

Í sama streng tók Herdís Pála Pálsdóttir framkvæmdastjóri rekstrarsviðs og mannauðsstjóri Deloitte á Íslandi. Í viðtali við Atvinnulífið fyrir stuttu hvatti hún fyrirtæki til að byrja sem fyrst að þjálfa og þróa mannauð sinn í takt við hraðar tækniframfarir.

Það er sannarlega þörf á nýrri þekkingu og hæfni sem við þurfum strax að byrja að ná okkur í, fyrir okkur sjálf og okkar fólk, svo það myndist ekki of mikil gjá eða skortur á vinnuafli sem getur unnið störf framtíðarinnar“ 

sagði Herdís Pála meðal annars.