Öll heimilis­verk skemmti­leg nema eitt

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna kringum 6:15.“

Hvað er það fyrsta sem þú gerir á morgnana?

„Ég vakna í rólegheitum um klukkan 6:15, græja það sem þarf fyrst á morgnana, sest með góðan kaffibolla og morgunmat, renn yfir Moggann og skoða vinnudagatalið. 

Svo keyri ég af stað um 7:15, hlusta á morgunútvarpið og byrja að spá í daginn. Það eru forréttindi að hafa gaman af vinnunni og hlakka til að vakna og mæta.“

Hvert er uppáhaldsheimilisverkið og hvaða heimilisverk finnst þér leiðinlegast?

„Mér finnst mjög gaman í eldhúsinu, get alveg gleymt mér yfir flóknum uppskriftum og dúllað mér við að elda í nokkra klukkutíma. Svo er auðvitað alltaf mjög gaman þegar börnin eða barnabörnin koma – þá er líf og fjör. Oft er ég farin að spá í helgarmatinn á fimmtudögum og skoða uppskriftir til að finna eitthvað rosa girnilegt.

Ég þarf að hugsa lengi til að finna eitthvað leiðinlegt, því ég er eiginlega svo skrítin að ég meira segja strauja mikið og finnst það bara nokkuð gaman – set þá á góða bók eða hlaðvarp og hlusta.

Ef eitthvað er leiðinlegt, þá er það að taka til í kompunni. Sama hversu oft ég tek þar til, þá virðist alltaf bætast við dót sem er fyrir og út um allt.“

Í hvaða verkefni ertu að vinna helst í þessa dagana?

„Hjá Fastus eru verkefnin mjög fjölbreytt. Núna erum við í mörgum ráðningum og fáum frábær teymi inn í allar deildir og í stjórnunarstörf. Það hafa verið miklar breytingar undanfarið og við erum á kafi í endurskipulagningu – að gera fyrirtækið enn öflugra og betra og einbeita okkur að því að vera fyrsti valkostur viðskiptavinarins. Það er alltaf hægt að gera betur.“

Hvernig skipuleggur þú þig í vinnu?

„Ég er sem betur fer mjög skipulögð að eðlisfari og er með allt skráð í dagbók. Ég tek líka mikið af minnispunktum á fundum til að passa að ekkert falli á milli og gleymist. Í miklu ati, eins og búið hefur verið að vera, er nauðsynlegt að skipuleggja tímann vel.

Við erum með framkvæmdastjórnarfundi á miðvikudagsmorgnum þar sem mörg mál eru tekin fyrir og oft fara af stað miklar og fjörugar umræður.

Mér finnst gott að mæta snemma og vera byrjuð á deginum, og frekar taka pásu seinnipart, fara í göngu í Heiðmörkinni og setjast svo aftur við tölvuna og klára daginn. 

Þetta virkar mjög vel fyrir mig.“

Hvenær ferðu að sofa á virkum kvöldum?

„Ég er mjög kvöldsvæf og algjör A-týpa ef svo má segja. Ég vil vera komin upp í rúm ekki seinna en klukkan 22 og stundum meira segja fyrr, fer allt eftir deginum. Ég er rosa hrifin af heilögu þrenningunni: svefni, hreyfingu og mataræði. Það er mitt jafnvægi.“