Innlent

Loðnuleit næstu vikur gæti orðið ávísun á tugmilljarða innspýtingu

Kristján Már Unnarsson skrifar
Rannsóknaskipin Bjarni Sæmundsson og Árni Friðriksson við höfuðstöðvar Hafrannsóknastofnunar í Hafnarfirði skömmu fyrir brottför Árna í dag.
Rannsóknaskipin Bjarni Sæmundsson og Árni Friðriksson við höfuðstöðvar Hafrannsóknastofnunar í Hafnarfirði skömmu fyrir brottför Árna í dag. Stöð 2/Egill Aðalsteinsson.

Hafrannsóknaskipið Árni Friðriksson lagði í dag upp í þriggja vikna loðnuleitarleiðangur. Bjartsýni ríkir í sjávarútvegsgeiranum um komandi loðnuvertíð og þar vonast menn til að hún geti skilað þjóðarbúinu tuttugu til þrjátíu milljarða króna búbót í vetur. Þetta kom fram í fréttum Stöðvar 2.

Loðnuvertíðin brást í fyrravetur og einnig veturinn þar á undan. Núna eru menn að gera sér vonir um að leiðangur Árna Friðrikssonar næstu vikur verði ávísun á mikla innspýtingu í þjóðarbúið í vetur.

Rannsóknarskip á vegum Grænlendinga tekur einnig þátt í leitinni, sem einkum mun beinast að svæðinu milli Íslands og Grænlands. Leiðangursstjórinn Birkir Bárðarson segir vonarneistann liggja í mikilli ungloðnu sem mældist í haustleiðangri í fyrra.

Birkir Bárðarson fiskifræðingur í brú Árna Friðrikssonar í dag.Stöð 2/Egill Aðalsteinsson.

„Við fengum góða ungloðnuvísitölu, sem gefur þá betri væntingar fyrir þessa vertíð núna heldur en hefur verið undanfarið,“ segir Birkir

Reyndar svo góðar væntingar að það er þegar búið að gefa út 170 þúsund tonna upphafskvóta, sem Birkir segir þó varúðarnálgun.

„En þar er talsverð varúð til að koma í veg fyrir að það sé verið að gefa of mikla ráðgjöf of snemma,“ segir fiskifræðingurinn.

Í Vestmannaeyjum segir Binni í Vinnslustöðunni, Sigurgeir Brynjar Kristgeirsson,  upphafskvótann gefa vonir um 400 þúsund tonna loðnuvertíð. Líkur séu á að verð á loðnuafurðum verði í hæstu hæðum í vetur og vonast hann til að loðnuvertíð skili 20 til 30 milljarða króna útflutningstekjum að þessu sinni.

Sigurgeir Brynjar Kristgeirsson, framkvæmdastjóri Vinnslustöðvarinnar í Vestmannaeyjum.Stöð 2/Arnar Halldórsson.

Auk Vestmannaeyja eru það Austfjarðahafnir sem eiga mest undir. Í samfélögum allt frá Þórshöfn og suður til Hornafjarðar munu menn bíða spenntir fregna af loðnuleit.

Áætlað er að haustleiðangrinum ljúki 5. október og nokkrum dögum síðar er að vænta nýrrar ráðgjafar Hafrannsóknastofnunar um veiðikvóta.

„Ég vonast þá til að það verði þá sæmileg vertíð úr þessu. En það er ekkert sem sker úr um það heldur en mælingin núna.

Og svo förum við aftur til mælinga í vetur, í janúar-febrúar,“ segir Birkir leiðangursstjóri.

Hér má sjá frétt Stöðvar 2:

Mikið er í húfi fyrir hlutaðeigandi byggðir, eins og lesa mátti í þessari frétt í byrjun árs:


Tengdar fréttir

Loðnan langt undir mörkum

Stærð hrygningarstofns loðnu samkvæmt mælingum í janúar var um 64 þúsund tonn. Er það langt undir þeim mörkum í gildandi aflareglu sem þarf að ná svo Hafrannsóknastofnun geti ráðlagt veiðar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.