Þögn á útvarpsstöðvunum í morgun

Þögn ríkti á stærstu útvarpsstöðum landsins í skamma stund á níunda tímanum í morgun. Tilgangur þagnarinnar var að vekja athygli á framlagi sjálfstætt starfandi tónlistarmanna til íslensks samfélags. Þeir hafa búið við mikið atvinnuleysi og fá úrræði síðustu mánuði vegna faraldurs kórónuveiru.

Útvarpsstöðvarnar Bylgjan, FM957, X977, Rás 1, Rás 2, K100 og Suðurland FM gerðu hlé á dagskrá sinni með algjörri þögn í stutta stund klukkan 8:45 í morgun. Um samstillt átak útvarpsstöðvanna var að ræða, sem ráðist var í að frumkvæði hins nýstofnaða Félags sjálfstætt starfandi tónlistarmanna (FSST).

Félagið kveðst í tilkynningu meta aðgerðina mikils. Þrátt fyrir hina stuttu þögn muni íslenskt tónlistarfólk „áfram sem áður standa með þjóð sinni, létta lund hennar og leggja sitt af mörkum.“

Staðan orðin alvarleg

Kórónuveirufaraldurinn hefur leikið íslenska tónlistarmenn grátt síðustu mánuði. Samkomubanni var komið á um miðjan mars og hefur verið í gildi með misháum fjöldamörkum síðan. Tónleika- og viðburðahald hefur þannig lagst nær alfarið af og segir FSST að staðan sem uppi er komin sé alvarleg. Úrræði fyrir tónlistarmenn séu jafnframt af skornum skammti.

„Tónlistarfólk sem hefur lifibrauð sitt af flutningi lifandi tónlistar hefur orðið fyrir gríðarlegu tekjutapi og framtíðin virðist ótrygg hvað viðburðahald og aðrar samkomur varðar. Sjálfstætt starfandi tónlistarfólk í íslenskum tónlistariðnaði starfar í sveiflukenndum og árstíðabundnum markaði, greiðir skatta og önnur gjöld en sökum eðli starfsins fellur utan öryggisnets samtryggingakerfisins þegar áföll sem þessi dynja á. Þá hefur sjálfstætt starfandi tónlistarfólk hvorki getað nýtt sér að neinu ráði tímabundin úrræði stjórnvalda né efnahagslegar viðspyrnuaðgerðir sem kynntar hafa verið,“ segir í tilkynningu FSST.

Félagið kallar eftir aðgerðum til að koma til móts við tekjutap félagsmanna.

„Félagsmenn FSST starfa ekki í tómarúmi, á okkur stóla rekstraraðilar tónlistar- og menningarhúsa, opinber og einkarekin, tækjaleigur, sviðsmenn, ljósamenn, hljóðmenn, hárgreiðslu- og förðunarfólk, ljósmyndarar, hönnuðir, auglýsendur og auðvitað fjölmargir aðrir. Sjálfstætt starfandi tónlistarfólk er mikilvægur hlekkur virðiskeðjunnar á fjölmörgum sviðum samfélagsins. Starfstéttin er í grafalvarlegri stöðu, félagsmenn berjast í bökkum og geta ekki beðið lengur. Það þarf að grípa til aðgerða og það strax því til viðbótar við núverandi stöðu er mikil hætta á brottfalli úr stéttinni og að nýliðun takmarkist mikið með alvarlegum og jafnvel óafturkræfum afleiðingum.“

Landsþekkt stjórn

FSST var stofnað 14. ágúst, einkum vegna stöðunnar sem lýst er hér að framan. Félagar eru sjálfstætt starfandi tónlistarfólk í íslenskum tónlistariðnaði og hefur félagið þann megintilgang að „standa vörð um réttindi, gæta hagsmuna og efla samstöðu félagsmanna“, auk þess sem það vill efla skilning á verktakastarfsemi sem ráðandi er í íslenskum tónlistariðnaði.

Fyrstu stjórn félagsins skipa landsþekktir tónlistarmenn. Helgi Björnsson er formaður og með honum í stjórn sitja Selma Björnsdóttir, Guðrún Ýr Eyfjörð (GDRN), Guðmundur Óskar Guðmundsson og Bubbi Morthens. Varamenn eru Páll Óskar Hjálmtýsson og Sigríður Thorlacius.