Laun­dóttir Alberts II fer fram á sömu réttindi og titla og syst­kinin

Belgíska listakonan Delphine Boël vonast nú til að dómstóll í landinu muni veita henni sömu réttindi og titla og önnur börn Alberts II, fyrrverandi Belgíukonungs. Konungurinn viðurkenndi í janúar síðastliðnum að hafa á sínum tíma eignast Boël utan hjónabands eftir að hafa þrætt fyrir faðernið í um áratug.

Hin 52 ára Boël hefur nú leitað til áfrýjunardómstóls í Brussel til að fá sínu framgengt.

Móðir Boël, Sybille de Selys Longchamps barónessa, fullyrðir að hún hafi átt í ástarsambandi við Albert II konung í átján ár, frá 1966 til 1984, það er nokkru áður en hann tók við krúnunni árið 1993.

Sögur um að konungurinn hafi eignast barn utan hjónabands komu fyrst fram opinberlega í ósamþykktri ævisögu um Paolu drottningu árið 1999. Boël fullyrti svo fyrst í viðtali árið 2005 að konungurinn væri faðir sinn. 

Albert II afsalaði sér krúnunni árið 2013 og það var fyrst þá – eftir að hann missti friðhelgi – sem Boël leitaði til dómstóla.

Hinn 86 ára Albert II á þrjú önnur börn; Filippus, sem nú er konungur landsins, Laurent prins og Astrid prinsessu.

Lögmaður Alberts segir að það sé ekki dómstóla að veita fólki titilinn „prinsessa“. Slíkt verði einungis gert með konunglegri tilskipun.