Haukar fyrstir til þess að vinna Her­mann og Þrótt - Kór­drengir og Njarðvík skildu jöfn

Tveir hörkuleikir fóru fram í 2. deild karla í kvöld.

Haukar voru fyrstir til þess að hafa betur gegn Hermanni Hreiðarssyni og lærisveinum í Þrótti Vogum eftir að Hermann tók við og topplið Kórdrengja gerði 1-1 jafntefli við Njarðvík.

Hermann hafði unnið fimm af fyrstu sjö leikjum sínum með Þrótt og gert jafntefli í hinum tveimur en í kvöld var komið að fyrsta tapinu.

Tómas Ásgeirsson og Kristófer Jónsson komu Haukunum yfir snemma leiks en Alexander Helgason og Júlíus Stefánsson jöfnuðu metin fyrir Þrótt.

Andri Jónasson fékk beint rautt spjald í liði Þróttar í upphafi síðari hálfleiks og Fannar Óli Friðleifsson fékk tvö gul spjöld með skömmu millibili í liði Hauka svo jafnt var í liðum á nýjan leik frá 61. mínútu.

Oliver Helgi Gíslason skoraði svo sigurmarkið tíu mínútum fyrir leikslok en í uppbótartíma fékk Andy Pew sitt annað gula spjald og þar með rautt í liði Þróttar úr Vogum.

Haukar eru í 2. sætinu með 24 stig og Þróttur Vogum er í 3. sætinu með 22 stig.

Í Njarðvík skildu Kórdrengir og Njarðvík 1-1 en Kórdrengir eru því áfram á toppnum með 27 stig. Njarðvík er í 6. sætinu með 21 stig.

Bessi Jóhannsson kom Njarðvík yfir í fyrri hálfleik en Arnleifur Hjörleifsson jafnaði metin nítján mínútum fyrir leikslok.

Lokatölur 1-1 og Kórdrengir, sem er nýliði í deildinni, með þriggja stiga forskot á annað sætið og fimm stiga forskot á 3. sætið er tólf umferðir eru búnar.