Nýi kóngurinn í Kórnum

HK-ingurinn Birnir Snær Ingason hefur farið á kostum í síðustu heimaleikjum Kópavogsliðsins.

Birnir Snær Ingason skoraði tvö mörk fyrir HK í gær þegar liðið vann 3-0 sigur á Gróttu í mikilvægum leik í neðri hluta Pepsi Max deildar karla.

Þetta var þriðji heimsigur HK-inga í röð og þeir eiga það allir sameiginlegt að Birnir Snær Ingason hefur verið á skotskónum.

Birnir Snær Ingason hefur nú skorað fimm mörk í síðustu þremur heimaleikjum HK, sigurmarkið á móti Blikum, tvö mörk í 3-1 sigri á Fjölni og svo tvö mörk í 3-0 sigri á Gróttu í gær.

Þessi fimm mörk eru jafnframt einu mörkin hans Birnis í Pepsi Max deildinni í sumar.

Birnir Snær Ingason skoraði líka bæði mörkin sín í deildinni í fyrra í Kórnum en þó fyrir sitthvort félagið.

Birnir Snær byrjaði tímabilið með Val og skoraði þannig sigurmark Hlíðarendafélagsins í 2-1 sigri á HK í Kórnum,

HK-ingar fengu síðan Birni frá Val 1. ágúst 2019 og eina deildarmarkið hans fyrir HK síðasta sumar kom í 4-1 sigri á KR í Kórnum.

Sjö síðustu mörk Birnis Snæs Ingasonar í Pepsi Max deildinni hafa því komið í Kórnum og þau hafa komið í tíu leikjum hans í húsinu.

Birnir Snær hefur aftur á móti spilað 29 deildarleiki í röð utan Kórsins án þess að skora.