Lífið

Independent fjallar um óvæntar vinsældir Daða Freys

Kristín Ólafsdóttir skrifar
Daði og Gagnamagnið flytja hér Think About Things, sem þá hét Gagnamagnið upp á íslensku, á seinna undankvöldi Söngavakeppni sjónvarpsins um síðustu helgi.
Daði og Gagnamagnið flytja hér Think About Things, sem þá hét Gagnamagnið upp á íslensku, á seinna undankvöldi Söngavakeppni sjónvarpsins um síðustu helgi. Mummi Lú

Daði Freyr Pétursson tónlistarmaður, sem tekur þátt í Söngvakeppni sjónvarpsins í ár með laginu Think About Things, ræðir óvæntar vinsældir framlagsins erlendis í viðtali við breska miðilinn Independent í dag.

Daði Freyr hefur vakið mikla athygli utan landsteinana með lagi sínu, sem á fyrra undankvöldi Söngvakeppninnar hét einfaldlega Gagnamagnið. Hljómsveitin sem stígur á stokk með Daða Frey í keppninni ber einmitt sama nafn.

Lagið hefur farið líkt og eldur í sinu um samfélagsmiðla, fangað athygli erlendra Eurovision-sérfræðinga – og nú í vikunni deildi Hollywood-leikarinn Russell Crowe myndbandi við lagið á Twitter-reikningi sínum.

Blaðamaður Independent segir myndbandið við Think About Things í flutningi Daða og Gagnamagnsins sýna „ein mest sannfærandi dansspor hérna megin hálfleikssýningarinnar á Superbowl“ og getur þess að myndbandið hafi jafnframt slegið í gegn á netinu.

Í því samhengi er téður Crowe nefndur, sem og Rylan Clark-Neal, Eurovision-kynnir þeirra Breta. Sá síðarnefndi deildi myndbandi Daða Freys á Twitter í vikunni og skrifaði: „Þessu gæti gengið vel.“



Þá innir Independent Daða Freyr sjálfan eftir viðbrögðum við allri athyglinni.

„Ég er 208 sentimetrar á hæð svo ég er vanur því að fólk veiti mér eftirtekt. Tilfinningin er svipuð og þegar ég tók þátt í Söngvakeppninni fyrir þremur árum. Enginn á Íslandi vissi hver ég var og það breyttist allt á einni nóttu,“ segir Daði Freyr.

„Þetta er á netinu þannig að þetta er örlítið fjarlægara, þannig að ég veit ekki nákvæmlega hvað þetta þýðir allt saman. Russell Crowe tísti laginu… hann er Skylmingaþrællinn sjálfur!“



Þá ræðir Daði Freyr jafnframt textann við lagið, sem hann segir fjalla um tíu mánaða dóttur sína og Árnýjar Fjólu Ásmundsdóttur. Árný er einmitt meðlimur Gagnamagnsins.

„Lagið fjallar um dóttur mína. Hún er tíu mánaða gömul, svo að ég er farinn að skilja hana aðeins betur, en það var skrýtið í upphafi, vegna þess að þú elskar manneskju svo mikið og hefur ekki hugmynd um hvað henni finnst um þig,“ segir Daði Freyr.

„Og svo er ég líka bara spenntur að sjá hvað henni mun almennt finnast um hlutina. Hún mun líklega hafa sterkar skoðanir á málefnum sem munu ögra þankagangi mínum gagnvart lífinu.“

Daði Freyr og Gagnamagnið taka þátt á úrslitakvöldi Söngvakeppninnar þann 29. febrúar næstkomandi í Laugardalshöll. Alls verða fimm lög flutt á úrslitakvöldinu en auk Daða Freys stíga á svið Ísold og Helga með Meet Me Halfway, Nína með Echo, Iva með Oculis Videre og Dimma með Almyrkva. Sigurvegarinn verður fulltrúi Íslands í Eurovision sem fram fer í Rotterdam í Hollandi í maí.

Umfjöllun Independent um Daða Frey og Gagnamagnið.


Tengdar fréttir

Russell Crowe fylgist með Daða Frey

Stórleikarinn Russell Crowe er greinilega mjög hrifinn af Daða Frey og Gagnamagninu en hann tísti í dag umfjöllun um lagið á Twitter-síðu sinni.

Aðeins eitt lag sungið á íslensku

Nú hefur verið ákveðið í hvaða röð lögin fimm koma fram á úrslitum Söngvakeppninnar 2020 sem fara fram í Laugardalshöll 29. febrúar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.