Körfubolti

Sportpakkinn: Tryggvi mun fara mikið hærra

Sindri Sverrisson skrifar
Tryggvi Snær Hlinason átti sinn besta landsleik í gær.
Tryggvi Snær Hlinason átti sinn besta landsleik í gær. vísir/bára

„Þetta var nánast fullkominn leikur hjá honum,“ sagði Benedikt Guðmundsson, fyrrverandi þjálfari Tryggva Snæs Hlinasonar, eftir stórleik Tryggva í sigrinum gegn Slóvakíu í Laugardalshöll í gær. Benedikt segir drauminn að Tryggvi gangi í raðir eins af risaliðum Evrópu á næstu þremur árum.

„Þetta var geðveik frammistaða, bæði í vörn og sókn. Það er ekki oft sem að menn eiga báða vallarhelmingana. Hann var frábær í sókn og vörn,“ sagði Benedikt við Svövu Kristínu Grétarsdóttur í Sportpakkanum á Stöð 2. Innslagið má sjá hér að neðan. Tryggvi skoraði 26 stig í leiknum, tók 17 fráköst og varði átta skot. Í hvaða þætti leiksins telur Benedikt miðherjann hafa bætt sig mest?

„Í öllu. Hann er að verða betri í öllum þáttum leiksins. Hann er orðinn betri sendingamaður, hefur alltaf verið góður frákastari en er samt orðinn betri, það er orðið betra hvernig hann tímasetur vörðu skotin, þetta er allt að verða betra. En mestu framfarirnar eru sóknarlega. Hann er orðinn meiri skorari en hann var. Það að skora 26 stig í landsleik er geggjað.“

Benedikt tekur undir að það breyti miklu hjá íslenska liðinu að hafa svo hávaxinn en jafnframt öflugan miðherja:

„Við höfum ekki átt alvöru hágæða miðherja síðan að Pétur Guðmundsson var að spila. Þetta kemur með algjörlega nýja vídd inn í landsliðið og gefur okkur möguleika á að verða alvöru landslið á evrópskan mælikvarða, ekki bara bakvarðasveit með „undersized“ karla eins og Hlyn [Bæringsson] til að slást við þessa stóru stráka. Núna erum við með alvöru miðherja, í fyrsta sinn í áratugi. Að vera svo með frábæra bakverði eins og Martin [Hermannsson], og millitýpur eins og Hauk Páls, gerir að verkum að ég er alveg ofsalega spenntur fyrir landsliðinu næstu 10-15 árin,“ segir Benedikt.

Benedikt þjálfaði Tryggva hjá Þór á Akureyri þegar þessi 22 ára gamli leikmaður var enn mjög ómótaður leikmaður, enda byrjaði hann ekki að æfa körfubolta fyrr en hann var 16 ára gamall. Tryggvi er nú leikmaður Zaragoza í efstu deild Spánar. Bjóst Benedikt við því að hann næði svona langt?

„Já, maður vissi að þakið væri hátt hjá honum. Þegar ég var með hann þá var hann tiltölulega nýbyrjaður en samt orðinn alveg svakalega spennandi eintak og nokkuð góður. Ég held að hann hafi þennan hæfileika að verða betri þegar hann spilar með betri mönnum. Hann aðlagast gæðunum í kringum hann. Ég sé hann fara nokkuð langt, hann á nóg inni og fer mikið hærra. Núna er hann í einu af þremur bestu liðum Spánar, sem er sterkasta deildin í Evrópu. Ég held að Evrópa henti honum betur en NBA, en ég held að NBA sé ekki útilokað. En ég vona að eftir svona þrjú ár verði hann kominn í eitthvað af risaliðunum í Evrópu, eins og Olympiacos, Panathinaikos, Barcelona eða Real Madrid. Það er draumurinn.“

Klippa: Nánast fullkominn leikur hjá Tryggva


Tengdar fréttir

Umfjöllun: Kósóvó - Ís­land 80-78 | Naumt tap í fyrsta leik

Íslenska karlalandsliðið í körfuknattleik hóf leik í undankeppni HM í dag þegar strákarnir okkar mættu Kósovó ytra í fyrsta leik undanriðilsins í dag. Lokatölur urðu 80-78 fyrir Kósovó. Auk þessara liða eru Lúxemborg og Slóvakía í þessum riðli en tvö efstu liðin fara áfram á næsta stig undankeppni HM.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.