Solskjær þakkaði markverði Tranmere fyrir að kveikja í sínu liði

Markvörður Tranmere hefði betur sleppt því að tala niður til Manchester United í aðdraganda bikarleiksins um helgina.

Ole Gunnar Solskjær, knattspyrnustjóri Manchester United, sá sína menn skora fimm mörk í fyrri hálfleik og vinna 6-0 sigur á Tranmere í ensku bikarkeppninni í gær. Þetta var í fyrsta sinn síðan Solskjær var sjálfur leikmaður liðsins að Manchester United skorar svona mörg mörk fyrir hálfleik.

Eftir leikinn þakkaði norski stjórinn markverði Tranmere fyrir að kveikja í sínu mönnum fyrir leikinn.

Solskjær thanks Tranmere goalkeeper for firing up Manchester United. By @AHunterGuardianhttps://t.co/pjmlJnSAR2

— Guardian sport (@guardian_sport) January 27, 2020

Markvörðurinn heitir Scott Davies og hefur verið stuðningsmaður Manchester City frá barnæsku. Hann fór í viðtal fyrir leik helgarinnar en hefði kannski betur sleppt því.

Scott Davies talaði í viðtalinu um „endalok“ Manchetser United liðsins og að United-menn gætu ekki lengur litið niður á bláu nágranna sína í Manchester City.

Eftir leikinn þá virtist Scott Davies labba utan í Ole Gunnar Solskjær á leið þeirra af velli. Það virtist aðeins kveikja í Norðmanninum.

„Takk fyrir að hjálpa okkur að kveikja í stuðningsmönnunum og leikmönnunum,“ sagði Ole Gunnar Solskjær við Scott Davies í framhaldinu.

Hinn 32 ára gamli markvörður hló af orðum Solskjær en Norðmaðurinn fór eftir það í viðtöl við fjölmiðla.

„Leikurinn í dag var leikur, þar sem allir aðrir en stuðningsmenn United, vildu að við töpuðum. Það hefur verið talsverð pressa á leikmönnunum en við þeir nutu þess að spila í dag. Nú fá þeir nokkra daga hvíld og svo byrjuðum við á fullu að nýju. Hugarfarið var fullkomið, við vorum að spila á erfiðum velli en nálguðumst það á réttan hátt,“ sagði Solskjær.