Berglind: Ætlum ekkert að fela það að við stefnum á titilinn

Breiðablik valtaði yfir KR á Kópavogsvelli í Pepsi Max deild kvenna í kvöld. Lokatölur 6-0 fyrir Blikum en yfirburðirnir voru gríðarlegir.

„Ég er gríðarlega sátt með hvernig liðið spilaði og við vorum tilbúnar frá upphafsmínútu og enduðum líka leikinn vel, þannig ég er mjög sátt. Þetta var mjög góður leikur af okkar hálfu og við munum bara gera betur í hverjum einasta leik hér eftir,“ sagði Berglind Björg Þorvaldsdóttir eftir leik, en hún fór á kostum í leiknum og skoraði þrjú mörk í fyrri hálfleik. 

Breiðablik er með fullt hús stiga eftir þrjár umferðir og ekki búið að fá á sig mark. Berglind segist ekki ætla að leyna því að Blikar stefna á Íslandsmeistaratitil og ekkert annað.

„Við ætlum bara að byggja ofan á þetta, við erum ekkert hættar. Við ætlum ekkert að fela það að við ætlum að stefna á titilinn, það hefur verið markmið okkar frá því í byrjun og breytist ekkert.“

Næsti leikur Breiðabliks er 30. júní í Laugardalnum á móti Þrótti.