Síð­degis mun vetur konungur minna á sig enn einu sinni

Veðurstofan spáir norðaustan kalda eða stinningskalda víðast hvar á landinu í dag. Má búast við dálitlum éljum norðaustanlands, en annars úrkomulítið.

Í hugleiðingum veðurfræðings á vef Veðurstofunnar segir að síðdegis muni vetur konungur þó enn einu sinni minna á sig þar sem þykkni upp og fer að snjóa suðvestanlands.

„Snjókomubakkinn fikrar sig síðan norðaustur yfir landið í nótt og fyrramálið þannig að einhver ofankoma verður í öllum landshlutum. Eftir hádegi á morgun dregur úr úrkomu, en seinnipartinn verður komin norðanátt á landinu með éljum norðantil, en að sama skapi birtir til syðra. Úrkomunni fylgir skammvinn hlýnun, en hiti mun ná upp fyrir frostmark með suðurströndinni.

Útlit er fyrir norðlæga átt og kólnandi veður á laugardaginn með éljum norðanlands en bjartviðri um landið sunnanvert. Léttskýjað og hægur vindur verður í öllum landshlutum á sunnudaginn, en á sunnudagskvöld fer að hvessa af suðri og hlýna þegar næsta lægð nálgast okkur með slyddu eða rigningu.“

Veðurhorfur á landinu næstu daga

Á föstudag: Suðlæg átt, víða 8-15 m/s, en snýst í norðaustanátt síðdegis. Snjókoma með köflum í öllum landshlutum, en úrkomulítið sunnan og vestanlands eftir hádegi. Frost 0 til 8 stig, en frostlaust við suðurströndina yfir daginn.

Á laugardag: Norðaustan 5-13 m/s. Dálítil él norðaustanlands annars úrkomulítið og allvíða bjartviðri síðdegis. Frost 2 til 12 stig.

Á sunnudag: Hæg breytileg átt og bjartviðri en kalt í veðri. Gengur í sunnan 10-18 og þykknar upp með snjókomu vestantil seinnipartinn og dregur úr frosti.

Á mánudag: Hvöss suðaustanátt með snjókomu eða slyddu en rigningu sunnan og suðaustanlands. Vestlægari vindur og él við suðurströndina um kvöldið en styttir upp norðantil. Yfirleitt frostlaust yfir daginn en kólnar aftur um kvöldið.

Á þriðjudag: Útlit fyrir suðvestanátt með éljagangi um landið sunnan- og vestanvert, en þurrviðri norðaustanlands. Hiti um og undir frostmarki.

Á miðvikudag: Útlit fyrir norðvestlæga átt og él í öllum landshlutum. Hiti breytist lítið.