Erlent

Býst hvorki við að Obama né Biden verði rannsakaðir

Kjartan Kjartansson skrifar
Trump hefur fullyrt að Obama fyrrverandi forseti hafi framið stærsta pólitíska glæp sögunnar án þess að skýra frekar í hverju hann fólst. Barr dómsmálaráðherra sagðist í dag ekki telja að Obama yrði rannsakaður.
Trump hefur fullyrt að Obama fyrrverandi forseti hafi framið stærsta pólitíska glæp sögunnar án þess að skýra frekar í hverju hann fólst. Barr dómsmálaráðherra sagðist í dag ekki telja að Obama yrði rannsakaður. Vísir/EPA

Dómsmálaráðherra Bandaríkjanna býst hvorki við því að Barack Obama, fyrrverandi forseti, né Joe Biden, fyrrverandi varaforseti og líklegt forsetaefni demókrata, verði rannsakaðir þrátt fyrir ítrekaðar fullyrðingar Donalds Trump forseta um óljóst samsæri þeirra. Gaf hann þó í skyn að „aðrir“ gætu verið sóttir til saka.

Undir stjórn Williams Barr, dómsmálaráðherra, var hafin rannsókn á Rússarannsókninni svonefndu. Rússarannsóknin var upphaflega leyniþjónusturannsókn og síðar sakamálarannsókn undir stjórn Roberts Mueller á því hvort að forsetaframboð Trump hefði átt í samráði við útsendara rússneskra stjórnvalda árið 2016.

Handvaldi Barr alríkissaksóknarann John Durham til að stýra þeirri rannsókn. Trump, Barr og aðrir repúblikanar hafa sakað alríkislögreglunnar og fyrrverandi forystu dómsmálaráðuneytisins um að hafa staðið óheiðarlega að rannsókninni með það fyrir augum að grafa undan Trump.

Á fréttamannafundi sem var ótengdur því máli í dag hafnaði Barr þeim möguleika að Obama eða Biden yrði skotmark þeirrar rannsóknar þegar hann var spurður út í ásakanir Trump forseta um að Obama og Biden hefðu framið glæpi.

Gagnrýndi Barr það sem hann kallaði „vaxandi tilraunir til þess að nota réttarkerfið sem pólitískt vopn“ en tók sérstaklega fram að hann ætti ekki sérstaklega við ummæli Trump forseta, að sögn Washington Post.

„Lagalega bragðið hefur verið að dikta upp ásakanir um glæpi pólitískra andstæðinga á grundvelli vafasömustu lögfræðikenninga. Þetta er ekki góð þróun,“ sagði Barr.

Obama fyrrverandi forseti virðist eiga hug Donalds Trump forseta allan þessa dagana. Forsetinn talar um fátt annað en meint samsæri forvera síns gegn sér.Vísir/EPA

Útilokar ekki að aðrir verði sóttir til saka

Rússarannsókninni svonefndu lauk með skýrslu Mueller, sérstaka rannsakanda dómsmálaráðuneytisins, í fyrra. Niðurstaða hans var að ekki væru nægilegar sannanir til að sýna fram á glæpsamlegt samsæri á milli framboðs Trump og Rússa. Mueller tók ekki afstöðu til þess hvort að Trump hefði reynt að hindra framgang réttvísinnar, meðal annars vegna þess að hann taldi sig ekki geta ákært sitjandi forseta. Lýsti Mueller þess í stað ellefu atvikum sem gætu talist tilraunir forsetans til að leggja stein í götu rannsóknarinnar.

Innri endurskoðandi dómsmálaráðuneytisins fór yfir vinnubrögð við Rússarannsóknina og ályktaði að alríkislögreglan hefði haft nægilegar sannanir til þess að hefja rannsóknina og að ekki hefði verið að finna pólitíska slagsíðu á henni, þrátt fyrir fullyrðingar Trump og bandamanna hans. Aftur á móti ávítaði endurskoðandinn FBI fyrir eftirlit með fyrrverandi starfsmanni framboðs Trump sem hann taldi hluta af stærri brestum alríkislögreglunnar hvað varðar hleranir á einstaklingum.

Þegar Barr svaraði spurningunni um Obama og Biden í dag ýjaði hann að því að einhverjir þeirra sem komu nálægt Rússarannsókninni yrðu sóttir til saka í rannsókn Durham.

„Hvað varðar Obama forseta og varaforsetinn, hver sem aðkoma þeirra var, byggt á þeim upplýsingum sem ég hef í dag, býst ég ekki við að vinna herra Durham leiði til sakamálarannsóknar á þeim. Áhyggjur okkar af mögulegum glæpum beinast að öðrum,“ sagði Barr sem vildi ekki gefa upp hverjir það væru.

Gagnrýndur fyrir að ganga pólitískra erinda Trump

Barr hefur sætt harðri gagnrýni fyrir að ganga pólitískra erinda Trump forseta, ekki síst í málum vina hans og ráðgjafa sem voru sóttir til saka í Rússarannsókninni. Þannig greip Barr fram fyrir hendurnar á saksóknurum í máli Roger Stone, vinar Trump og óformlegs ráðgjafa framboðsins, þegar þeir kröfðust refsingar yfir honum í vetur. Allir saksóknararnir sögðu sig frá málinu eftir að Barr lét milda verulega refsikröfu þeirra.

Þá vakti ákvörðun dómsmálaráðuneytisins um að draga til baka ákæru á hendur Michael Flynn, fyrsta þjóðaröryggisráðgjafa Trump, í þarsíðustu viku furðu. Flynn hafði í tvígang játað sig sekan um að hafa logið að alríkislögreglunni um samskipti sín við rússneskan sendiherra og leynileg málafylgjustörf fyrir tyrknesk stjórnvöld. Fordæmalaust er sagt að saksóknarar dragi til baka ákæru þegar sakborningur hefur játað sök.

Nú heldur ráðuneytið því fram að ekki hafi verið gild ástæða til að yfirheyra Flynn og því skipti játning hans ekki máli. Flynn heldur því sjálfur fram að hann hafi verið fórnarlamb samsæris FBI, saksóknara og jafnvel eigin lögmanna. Dómari hefur ekki enn fallist á beiðni ráðuneytisins um að fella málið niður.

Trump hefur notað mál Flynn til að halda uppi óljósum ásökunum um að Obama og Biden hafi framið ótilgreinda glæpi. Þegar Trump var spurður út í það hvaða glæpir það væru í síðustu viku var fátt um svör. Blaðafulltrúi Hvíta hússins hélt því fram að glæpur Obama hefði verið að leynd hafi verið aflétt af nafni Flynn þegar símtal hans og rússneska sendiherrans var hlerað.

Slíkar afléttingar eru þó sagðar alvanalegar við leyniþjónusturannsóknir. Trump-stjórnin sjálf hefur þannig aflétt leynd af nöfnum þúsunda bandarískra borgarar sem hafa náðst á upptöku í samskiptum við einstaklinga sem leyniþjónustan fylgist sérstaklega með.


Tengdar fréttir

Segir Obama hafa átt að halda kjafti

Mitch McConnell, leiðtogi Repúblikanaflokksins í öldungadeild Bandaríkjaþings, segir að Barack Obama, fyrrverandi forseti Bandaríkjanna, hefði ekki átt að gagnrýna Donald Trump, núverandi forseta, fyrir viðbrögð hans við heimsfaraldri nýju kórónuveirunnar og vegna inngripa hans í dómskerfi Bandaríkjanna.

Endurskrifa söguna í máli Michael Flynn

Rúmum þremur árum eftir að Donald Trump, forseti Bandaríkjanna, rak Michael Flynn, þáverandi þjóðaröryggisráðgjafa sinn, fyrir að ljúga að Mike Pence, varaforseta, og starfsmönnum Alríkislögreglu Bandaríkjanna, sem er glæpur, eru Trump-liðar nú að reyna að endurskrifa söguna.

Tækju Flynn aftur með opnum örmum

Michael Flynn, fyrsti þjóðaröryggisráðgjafi Donald Trump Bandaríkjaforseta, er velkominn aftur til starfa í ríkisstjórninni, að sögn Mike Pence, varaforseta. Flynn var látinn segja af sér á sínum tíma fyrir að ljúga að Pence.

Trump sagði Pútín að Rússarannsóknin hefði verið „gabb“

Donald Trump Bandaríkjaforseti kallaði rannsókn á meintu samráði framboðs hans við Rússland „gabb“ í símtali við Vladímír Pútín, forseta Rússlands, sama dag og dómsmálaráðuneyti Trump felldi niður ákæru á hendur fyrrverandi þjóðaröryggisráðgjafa sem laug að alríkislögreglunni FBI um samskipti sín við Rússland.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×