Skoraði sex mörk og lagði upp fjögur í einum og sama leiknum

Hollenska landsliðskonan Vivianne Miedema fór hamförum þegar Arsenal vann stórsigur á Bristol City, 11-1, í ensku kvennadeildinni í dag.

Miedema skoraði sex mörk í leiknum og lagði upp fjögur til viðbótar. Hún kom því með beinum hætti að tíu af ellefu mörkum Arsenal í leiknum.

Staðan var 5-0 í hálfleik, Arsenal í vil. Miedema skoraði þrjú markanna og lagði hin tvö upp. Hún endurtók svo leikinn í seinni hálfleik; skoraði þrennu og gaf tvær stoðsendingar.

Vivianne Miedema today:





Arsenal put 11 past Bristol City, and she was involved in 10 of them  pic.twitter.com/TRwalKhA17

— Goal (@goal) December 1, 2019

Miedema fékk heiðursskiptingu á 70. mínútu og kom því ekkert að ellefta og síðasta marki Arsenal. Það gerði Emma Mitchell sem kom inn á sem varamaður fyrir Miedema.

Hún hefur skorað í síðustu átta leikjum sínum fyrir Arsenal og hollenska landsliðið; alls 20 mörk.

Miedema varð Englandsmeistari með Arsenal á síðasta tímabili. Hún varð einnig tvisvar þýskur meistari með Bayern München. Þá átti Miedema stóran þátt í því að Holland varð Evrópumeistari fyrir tveimur árum.