Sænskur klósettpappírsrisi þakkar hömstrun fyrir methagnað

Tryggvi Páll Tryggvason skrifar 14. apríl 2020 15:47

Það þurfa flestir á klósettpappír að halda. Vísir/AP

Hlutabréf í sænska fyrirtækinu Essity, eins stærsta klósettpappírsframleiðanda heims, hækkuðu mjög í sænsku kauphöllinni í dag eftir að fyrirtækið tilkynnti að hagnaður þess á fyrsta ársfjórðungi hefði vaxið um 67 prósent.

Fyrirtækið sérhæfir sig í framleiðslu ýmissa hreinlætisvara, þar á meðal klósettpappírs. Víða um heim gripu óttaslegnir einstaklingar einmitt til þess ráðs að hamstra klósettpappír í kórónuveirufaraldrinum sem nú gengur yfir heimsbyggðina.

Og nú virðist sem þessi hjarðhegðun hafi skilað sér beint í kassann hjá Essity sem tilkynnti sænsku kauphöllinni það í dag að hagnaður fyrirtækisins á fyrsta ársfjórðungi yrði nálægt 5,3 milljörðum sænskra króna, um 75 milljörðum íslenskra króna á gengi dagsins í dag.

Þar með jókst hagnaðurinn um 67 prósent á milli ársfjórðunga en í tilkynningu Essity er hagnaðurinn helst rakinn til þess að víða um heim hafi klósettpappírinn sem fyrirtækið framleiðir verið hamstraður grimmt.

Forsvarsmenn fyrirtækisins gera þó ráð fyrir að hömstrunin geti haft slæm áhrif á sölu fyrirtækisins á klósettpappír í náinni framtíð, þar sem margir sitji nú upp með töluverðar birgðir af klósettpappír. Þá reiknar fyrirtækið með að minni ferðalög og færri heimsóknir á veitingastaði muni skila sér í minnkandi sölu á vörum fyrirtækisins.

Svíþjóð

Tengdar fréttir

Hvetja Breta til þess að hætta að hamstra

Verslunareigendur á Bretlandi líkja kaupæðinu vegna kórónuveirufaraldursins við jólaörtröðina. Svo rammt kveður að því að fólk hamstri nauðsynjar að stærstu verslunarkeðjur landsins hvetja fólk opinberlega til að hemja sig.

15. mars 2020 12:42

Landsmenn hamstra sem aldrei fyrr

12. mars 2020 23:15

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.