Fá að hittast á fundi Ríkis­sátta­semjara með leyfi sótt­varna­læknis

Fjarfundi samninganefnda Félags hjúkrunarfræðinga og íslenska ríkisins lauk rétt fyrir hádegi í dag. Aðalsteinn Leifsson ríkissáttasemjari segir fundinn hafa verið góðan og annar fundur hafi verið boðaður í húsakynnum sáttasemjara á morgun klukkan 13. Þar munu samninganefndir hittast í persónu, þrír frá félagi hjúkrunarfræðinga, þrír frá íslenska ríkinu og tveir frá sáttasemjara.

Er það gert með leyfi sóttvarnalæknis en átta í heildina munu sitja þennan fund.

Aðalsteinn segir að mikill árangur hafi náðst í að finna lausnir í styttingu vinnuvikunnar og vinnutilhögun í vaktavinnu. Þá hefur einnig náðst sór áfangi í því sem við kemur endurmenntun og orlofsmál.

Það sem eftir stendur er launaliðurinn.

Aðalsteinn segir í samtali við Vísi að allir finni til mikillar ábyrgðar í þessum viðræðum að leysa þessa kjaradeilu. Hann segir einlægan vilja hjá báðum samninganefndum að finna lausnir á þessari þungu og flóknu deilu.