Tryggvi með þrennu fyrir ÍA | Fylkir vann Fram

Tryggvi Hrafn Haraldsson skoraði þrennu í 4-1 sigri ÍA gegn Leikni R. í Lengjubikarnum í fótbolta í kvöld.

Viktor Jónsson skoraði einnig fyrir ÍA í kvöld en Leiknismenn minnkuðu muninn í 3-1 á 53. mínútu með marki Dags Austmann Hilmarssonar. Leiknir fékk vítaspyrnu skömmu síðar en Árni Snær Ólafsson varði frá Sævari Atla Magnússyni.

ÍA er með 6 stig eftir 4 leiki í 1. riðli A-deildar, þremur stigum á eftir Breiðabliki sem hefur unnið alla þrjá leiki sína. Leiknir er með 3 stig eftir 3 leiki.

Í riðli 2 vann Fylkir 2-1 sigur gegn Fram í Safamýri. Fylkismenn eru því með 7 stig eftir 4 leiki en Framarar án stiga eftir 3 leiki.