Kristjana og Haraldur halda á vit ævintýranna í Barcelona

Íþróttafréttakonan og Gettu betur þulurinn Kristjana Arnarsdóttir hefur auglýst íbúðina sína til leigu og flytur til Spánar á næsta ári. Kristjana og kærasti hennar Haraldur Franklín Magnús hafa verið saman í nokkur ár og ætla að njóta næsta árs saman í sólinni og hitanum.

„Við kærastinn minn ætlum að flytja til Barcelona um miðjan mars, eftir Gettu betur, bara fara smá á vit ævintýranna. Hann er afrekskylfingur þannig að hann ætlar að æfa og spila golf og ég ætla bara svolítið að taka þátt í því ævintýri,“ segir Kristjana í samtali við Vísi.  

Hún segir að það hafi verið svo skemmtilegt að taka þátt í Gettu betur að hún hafi ekki getað hugsað sér að sleppa því. Þess vegna völdu þau að flytja ekki út fyrr en í mars á næsta ári.

„Þetta er búið að vera ótrúlega gaman og frábær hópur auðvitað í kringum þetta. Við erum spennt að byrja nýtt tímabil og erum aðeins byrjuð að hittast og leggja línurnar.“

 

Vaktavinna og mikið af ferðalögum

Haraldur Franklín hefur vakið mikla athygli fyrir árangur í golfinu og eins og sagt hefur verið frá hér á Vísi, er Haraldur Franklín kominn með sæti á Áskorendamótaröðinni á næsta ári. 

„Við ætlum að taka allavega bara næsta ár og svo bara sjáum við til. Ég tek mér ársleyfi frá RÚV og við ætlum að leyfa okkur að vera aðeins saman, sem er kannski ekki alltaf auðvelt þegar maður er í sambandi þar sem ég er í mikilli vaktavinnu og hann er mikið erlendis að spila. Við ætlum svona áður en við gerum eitthvað annað í lífinu að eiga smá tíma í heitu landi.“

 

 

 

View this post on Instagram

Þessi búinn að eiga geggjað 2019 og er nú kominn inn á næst sterkustu golfmótaröð Evrópu eftir frábæra spilamennsku í ár. Það er svo ótrúlega gaman að sjá besta vin sinn ná markmiðum sínum

A post shared by Kristjana Arnarsdóttir (@kristjanaarnars) on Oct 10, 2019 at 8:16am PDT

Ætla að upplifa mótið saman

Kristjana segir að meginástæða þess að þau eru að stökkva af stað sé að Haraldur fái þarna tækifæri til að æfa á frábærum völlum alltaf í stað þess að þurfa að treysta á veðrið hér á landi.

„Við ætlum að láta reyna á þetta. Svo býður þetta upp á alls konar ferðalög. Hann er að ferðast mikið í golfinu og ég ætla að reyna að elta hann í mót. Hann komst inn á Challenge Tour mótaröðina og það er svolítið stórt þannig að við viljum líka gefa því vægi. Hann er að standa sig svo vel að mig langar að elta hann svolítið í því og upplifa það með honum.“

Hún viðurkennir að golfáhuginn sé farinn að smitast í aðra fjölskyldumeðlimi.

„Ég er aðeins farin að spila. Það er svona meira foreldrar mínir og fjölskyldan í kring.“

Haraldur grípur þá inn í og bendir á að Kristjana hafi nú fengið einn „birdie“ eða fugl, en þá spilar golfarinn á einu höggi undir pari.

„Þetta er allt að gerast,“ segir Kristjana og hlær. Hún ætlar að vera sjálf dugleg í golfinu á Spáni ásamt því að fara í tungumálanám.

„Ég ætla að láta langþráðan draum rætast í leiðinni og læra spænsku, ég lærði hana í menntaskóla en hefur alltaf langað til að ná almennilegum tökum á henni.“

 

 

 

View this post on Instagram

Varð 29 ára í dag. Fagnaði deginum nákvæmlega svona Skála bara seinna!

A post shared by Kristjana Arnarsdóttir (@kristjanaarnars) on Aug 16, 2019 at 10:49am PDT

Dýrt að vera atvinnukylfingur á Íslandi

Það eru því töluverðar breytingar framundan á íþróttadeild RÚV en Edda Sif Pálsdóttir samstarfskona Kristjönu á von á barni og er á leið í fæðingarorlof á næsta ári. Kristjana ætlar þó ekki alveg að kveðja skjáinn á meðan hún býr úti og ætlar hugsanlega að taka einhverjar vaktir á íþróttadeildinni, enda er mikið að gerast í íþróttunum á næsta ári.

„Ég kem alveg heim, ég er ekki alveg að kveðja í bili en að megninu til ætla ég að reyna svolítið að leyfa mér að lifa smá. Kannski kominn tími á að aðeins að pústa.“

Þegar Kristjana og Haraldur völdu sér borg á Spáni var aðalatriðið að þar væri alþjóðaflugvöllur þar sem það auðveldi honum öll ferðalög innanlands og út fyrir landsteinana.

„Það er auðvitað ótrúlega dýrt að vera atvinnukylfingur á Íslandi af því að þú ert alltaf að fljúga héðan í stað þess að geta flogið frá meginlandinu. Þannig að við erum að sjá að það muni spara okkur aðeins í útgjöldum að geta gert út þaðan.“

Kristjana segir að þau ætli bara að „lifa og njóta“ á Spáni áður en eitthvað annað gerist í þeirra lífi, njóta lífsins saman.

„Við ætlum bara svolítið að leyfa þessu að ráðast. Það getur vel verið að okkur líki ekkert og viljum koma heim aftur og þá bara gerum við það. En þá allavega munum við ekkert sjá eftir því að hafa ekki stokkið á þetta þegar tækifærið gafst.“