Stjórn Jóhönnu vinsælli en ríkisstjórn Sigmundar Davíðs ári eftir kosningar

Rúmur fjórðungur landsmanna er ánægður með störf ráðherra í ríkisstjórn Sigmundar Davíðs Gunnlaugssonar en um helmingur óánægður, samkvæmt könnun Capacent. Ánægjan með ráðherra ríkisstjórnarinnar er minni en með ráðherra í síðustu ríkisstjórn eftir rúmt ár í embætti.

Capacent kannar reglulega ánægju fólks með störf ráðherra, síðast birti fyrirtækið niðurstöður slíkrar könnunar á þriðjudag. Sé meðaltal ráðherranna skoðað sést að um 26 prósent eru að meðaltali ánægð með störf ráðherranna, 22 prósent eru hvorki ánægð né óánægð og 51 prósent er óánægt.

Ánægjan með ráðherrana er minni en í könnun Capacent sem gerð var í apríl 2010. Þá hafði ríkisstjórn Jóhönnu Sigurðardóttur setið í um það bil ár, eins og ríkisstjórn Sigmundar Davíðs nú. Þá sögðust að meðaltali 29 prósent ánægð með ráðherrana, 30 prósent hvorki ánægð né óánægð en 42 prósent sögðust óánægð.

„Það er augljóst miðað við samanburðartímann, þetta fyrsta ár ríkisstjórnanna, að núverandi ríkisstjórn er óvinsælli en sú gamla,“ segir Grétar Þór Eyþórsson, prófessor í stjórnmálafræði við Háskólann á Akureyri.

Hann bendir á að utanþingsráðherrarnir tveir, Gylfi Magnússon og Ragna Árnadóttir, hafi verið vinsælustu ráðherrar fyrri stjórnar á þessum tíma, og þeir hafi átt sinn þátt í að hífa upp ánægju með þá stjórn.

Grétar segir að stjórn Jóhönnu hafi þegar steytt á fyrsta Icesave-skerinu þegar þarna var komið, og lítið hafi farið fyrir loforðum um norræna velferð og skjaldborg um heimilin. Á móti sé núverandi ríkisstjórn búin að kynna niðurfellingu lána, sem hafi verið stærsta kosningaloforð Framsóknarflokksins.

Grétar segir litla ánægju með Bjarna Benediktsson, formann Sjálfstæðisflokksins, vekja athygli. Það megi hugsanlega setja í samhengi við umdeilda þingsályktunartillögu um slit aðildarviðræðna við Evrópusambandið.